سرکاری میڈیکل کالجوں میں نئی نشستیں، طلبہ کیلئے بڑی خوشخبری آگئی

لاہور (قدرت روزنامہ) سرکاری میڈیکل کالجوں میں نئی نشستیں بڑھانے کا اہم فیصلہ کر لیا گیا ہے۔ پاکستان میڈیکل اینڈ ڈینٹل کونسل (PMDC) نے پنجاب کے سرکاری میڈیکل کالجوں میں 475 نئی نشستوں کی منظوری دے دی، جس سے ہزاروں طلبہ کو کم لاگت میں میڈیکل تعلیم حاصل کرنے کا موقع ملے گا۔
حکام کے مطابق سرکاری میڈیکل کالجوں میں نئی نشستیں شامل ہونے کے بعد داخلوں کی مجموعی تعداد تقریباً 4 ہزار تک پہنچ جائے گی۔ اس فیصلے سے ایسے طلبہ کو بھی فائدہ ہوگا جو نجی میڈیکل کالجوں کی بھاری فیسیں ادا کرنے کی استطاعت نہیں رکھتے۔
یونیورسٹی آف ہیلتھ سائنسز (UHS) کے مطابق منظور کی گئی 475 نشستیں تقریباً پانچ نجی میڈیکل کالجوں کی مجموعی گنجائش کے برابر ہیں۔ اس اضافے سے میرٹ پر سرکاری اداروں میں داخلے کے امکانات مزید روشن ہوں گے۔
تعلیمی ماہرین کا کہنا ہے کہ سرکاری نشستوں میں اضافہ نہ صرف میڈیکل تعلیم کو زیادہ طلبہ کی پہنچ میں لائے گا بلکہ نجی میڈیکل کالجوں پر انحصار بھی کم کرے گا، جہاں لاکھوں روپے سالانہ فیس وصول کی جاتی ہے۔
ماہرین کے مطابق یہ اقدام میڈیکل تعلیم کے شعبے میں مثبت پیش رفت ہے، جس سے باصلاحیت مگر محدود مالی وسائل رکھنے والے طلبہ کو آگے بڑھنے کا بہتر موقع ملے گا۔ اس کے ساتھ ساتھ سرکاری اداروں میں میرٹ کی بنیاد پر داخلوں کا نظام مزید مضبوط ہونے کی توقع بھی ظاہر کی جا رہی ہے۔
تعلیمی حلقوں نے امید ظاہر کی ہے کہ مستقبل میں بھی سرکاری میڈیکل کالجوں میں نشستوں میں اضافے اور تعلیمی سہولیات کی بہتری کے لیے ایسے اقدامات جاری رہیں گے تاکہ ملک میں معیاری طبی تعلیم تک زیادہ سے زیادہ طلبہ کی رسائی ممکن ہو سکے۔