کوچ سے اختلافات اور پرتگال کی ٹیم کاکیمپ چھوڑنے پر رونالڈو کی لب کشائی، ریٹائرمنٹ نہ لینے کا اعلان

پرتگال(قدرت روزنامہ)پرتگال سے تعلق رکھنے والے دنیائے فٹبال کے اسٹار کھلاڑی کرسٹیانو رونالڈو نے ہیڈ کوچ جارج جیسس سے مبینہ اختلافات کے بعد پرتگال کی قومی ٹیم کا تربیتی کیمپ چھوڑنے کے معاملے پر لب کشائی کرتے ہوئے انٹرنیشنل فٹبال سے ریٹائر نہ ہونے کا فیصلہ کیا ہے۔
گزشتہ دنوں نیشن لیگ میں ناروے کے خلاف میچ میں رونالڈو کو وارم اپ کرانے کے باوجود میدان میں نہیں اتارا گیا اور بعد میں جب انہیں معلوم ہوا کہ وہ ڈنمارک کے خلاف بھی میچ کی ابتدائی فائنل الیون میں شامل نہیں تورونالڈو غصے میں پرتگال ٹیم کا کیمپ چھوڑ کر چلے گئے تھے۔
پرتگال کی ٹیم چھوڑنے کے بعد منتظمین نے فوراً ہی رونالڈو کا 7 جرسی نمبر ایک اور کھلاڑی کو دے دیا تھا جس کے بعد رونالڈو کے فینز میں شدید بے چینی اور غم و غصہ دیکھا گیا جس کی وجہ سے فینز نے پرتگال کی آفیشل ٹیم کے انسٹاگرام کو ان فالو کرنا شروع کردیا۔
پرتگال ٹیم کے کوچ جارج جیسس نے کہاتھا کہ اگر رونالڈو واپس آنا چاہتے ہیں تو ان کا خیرمقدم کیا جائے گا۔
اس صورتحال کے بعد قیاس آرائیاں جاری تھیں کہ رونالڈو اب پرتگال کی ٹیم کو ہمیشہ کے لیے خیرباد کہہ چکے ہیں اور ان کے فینز اب انہیں پرتگال کی ٹیم میں کھیلتا نہیں دیکھیں گے۔
تاہم رونالڈو نے اس سب معاملے پر لب کشائی کرتے ہوئے سوشل میڈیا پر ایک طویل پیغام میں پرتگال کی ٹیم سے ریٹائرمنٹ کا نہ لینے کا اعلان کیا۔
رونالڈو نے اپنی سوشل میڈیا پوسٹ میں لکھا کہ وہ انٹرنیشنل فٹبال سے ریٹائر نہیں ہو رہے اور پرتگال کے کیمپ کو چھوڑ جانے پر وہ سزا کے مستحق ہیں۔
رونالڈو نے اپنے بیان میں کہا کہ پرتگالی فٹبال فیڈریشن کو میرے اقدامات کے نتائج کا جائزہ لینا چاہیے اور مجھے ان پر سزا دینی چاہیے۔ میرا ماننا ہے کہ سزا میں کمی نہیں کی جانی چاہیے۔ میں پہلے ہی معذرت کر چکا ہوں، لیکن میں جانتا ہوں کہ اقدامات کے نتائج ہوتے ہیں۔
اسٹار فٹبالر نے کہا کہ اگر میں جسمانی طور پر فٹ ہوں، اپنی ٹیم کے لیے کھیل رہا ہوں اور امید ہے کہ گول بھی کر رہا ہوں تو میں انٹرنیشنل فٹبال جاری رکھنا چاہوں گا ۔ میں ہمیشہ کی طرح قومی ٹیم کے لیے کھیلنے اور اسے کامیابیاں دلانے کے لیے دستیاب ہوں۔
تقریباً 2 ہزار الفاظ پر مشتمل بیان میں رونالڈو نے بعض مقامات پر مصالحتی انداز اپنایا ، تاہم انہوں نے پرتگال کے کوچ جارج جیسس پر تنقید بھی کی اور گزشتہ ہفتے کیمپ چھوڑنے کی وجہ بننے والے تنازعے کے بارے میں کھل کر اپنا مؤقف پیش کیا۔
رونالڈو کے مطابق جیسس نے ایک منصوبے پر اتفاق کیا تھا جس کے تحت مجھے فٹنس کا خیال رکھنے کے لیے ناروے اور ڈنمارک کے خلاف میچز میں آرام دیا جانا تھا۔تاہم ناروے کے خلاف میچ کے روز 72 سالہ کوچ نے انہیں بتایا کہ وہ 30 منٹ کھیلیں گے۔
رونالڈو نے کہا کہ باقی سب کو معلوم ہے۔ میں دوسرے ہاف کے آغاز سے وارم اپ کرتا رہا، وقت گزرتا رہا لیکن مجھے میدان میں نہیں اتارا گیا۔کوچ نے اپنا وعدہ توڑا۔ بعد ازاں جیسس کے ساتھ ہونے والی ملاقات میں اتفاق ہوا کہ کوچ اپنی اگلی پریس کانفرنس میں معاملے کی وضاحت کریں گے لیکن جیسس نے اپنا وعدہ پورا نہیں کیا بلکہ پریس کانفرنس میں جارحانہ انداز میں گفتگو کی، جس کے باعث دونوں کے درمیان اعتماد کا رشتہ متاثر ہوا۔
رونالڈو نے کہا کہ میں اپنے تمام مداحوں، اور خاص طور پر تمام پرتگالی عوام سے یہ وعدہ کرتا ہوں کہ ہمارے الوداعی میچز ہوں گے۔
واضح رہے کہ النصر کے فارورڈ رونالڈو پرتگال کی جانب سے 234 میچز میں 146 گول کر چکے ہیں، جو دونوں عالمی ریکارڈ ہیں۔ انہوں نے پرتگال کو 2016 کی یورپی چیمپئن شپ اور دو مرتبہ نیشنز لیگ جتوانے میں اہم کردار ادا کیا۔