وزیراعظم سے کراچی کے ایم این ایز کی ملاقات: نجیب ہارون اور عامر لیاقت کی عدم شرکت

اسلام آباد(قدرت روزنامہ) کراچی کے اراکین قومی اسمبلی نے وزیراعظم عمران خان کی قیادت پر مکمل اعتماد کا اظہار کیا ہے . ہم نیوز کے مطابق شہر قائد کے اراکین قومی اسمبلی نے اعتماد کا اظہار وزیراعظم عمران خان سے ہونے والی ملاقات میں کیا .

ملاقات میں گورنر سندھ عمران اسماعیل، وزیر دفاع پرویز خٹک، وفاقی وزیر برائے بحری امور سید علی حیدر زیدی اور وزیراعظم کے معاون خصوصی ملک محمد عامر ڈوگر بھی موجود تھے .
ہم نیوز کے مطابق ہونے والی ملاقات میں آفتاب صدیقی، سیف الرحمان، عطا اللہ، اکرم چیمہ، فہیم خان، اسلم خان، عالمگیر خان، عبدالشکور شاد، کیپٹن جمیل، آفتاب جہانگیر، صائمہ ندیم اور نصرت واحد شامل تھیں .
ذرائع کے مطابق کراچی سے پاکستان تحریک انصاف کے بانی رکن و رکن قومی اسمبلی انجینئر نجیب ہارون اور عامر لیاقت حسین وزیراعظم سے ہونے والی ملاقات میں شامل نہیں تھے .
اس ضمن میں ذرائع کا کہنا ہے کہ وزیراعظم عمران خان نے عامر لیاقت حسین کو بھی آج ہی ملاقات کے لیے بلایا تھا . ذرائع کے مطابق عامر لیاقت حسین وزیراعظم نے ون ٹو ون ملاقات کرنے کے خواہش مند ہیں .
ہم نیوز نے ذرائع کے حوالے سے بتایا ہے کہ ہونے والی ملاقات میں کراچی میں وفاقی حکومت کی جانب جاری ترقیاتی منصوبوں پر بھی تفصیلی بریفنگ دی گئی اور گفتگو ہوئی . واضح رہے کہ گزشتہ دنوں رکن قومی اسمبلی عامر لیاقت کو منانے کے لیے گورنر سندھ عمران اسماعیل ان کے گھر بھی گئے تھے .
پی ٹی آئی کے بانی رکن نجیب ہارون جنہوں نے بحیثیت رکن قومی اسمبلی اپنی تنخواہ نہ لینے کا اعلان کیا تھا، کچھ عرصہ قبل اپنی ناراضگی کا اظہار کرتے ہوئے اپنی نشست سے مستعفی بھی ہوگئے تھے اور استعفیٰ بھیج دیا تھا لیکن وہ منظور نہیں کیا گیا تھا . واضح رہے کہ نجیب ہارون کا شمار ان اراکین قومی اسمبلی میں ہوتا ہے جنہوں نے سب سے زیادہ ٹیکس ادا کیا تھا .