عمران خان پر تنقید کرنیوالی مریم نواز پر پی ٹی آئی رہنماؤں کے جوابی وار
اسلام آباد (قدرت روزنامہ)مسلم لیگ ن کی نائب صدر مریم نواز کی جانب سے سابق وزیراعظم عمران خان پر کڑی تنقید پر پی ٹی آئی رہنماؤں نے انہیں کرارے جوابات دیے ہیں۔پاکستان تحریک انصاف کے رہنما اور سابق وفاقی وزیر فواد چوہدری نے مسلم لیگ ن کی نائب صدر مریم نواز کی عمران خان پر تنقید کا جواب سماجی رابطوں کی ویب سائٹ ٹوئٹر پر دیا ہے۔
فواد چوہدری نے اپنے ٹوئٹ میں کہا ہے کہ عمران خان تو خود کئی کھلاڑیوں کو کھیل سکھا چکے ہیں انہیں کوچ کی ضرورت نہیں جب کہ مریم نواز جیسے امیچور کبھی کھلاڑی نہیں بن سکتے کوچ چاہے جتنا کوالیفائیڈ ہو۔
پی ٹی آئی رہنما نے مزید کہا کہ مریم اور بلاول ابو بچاؤ مہم سے لیڈر بننا چاہتے ہیں، لیکن کوچ جو بھی ہو کھیل کو کھلاڑیوں نے کھیلنا ہے اور یہ صلاحیت ان پلیئرز میں نہیں ہے۔
عمران خان تو خود کئ کھلاڑیوں کو کھیل سکھا چکے ہیں انھیں کوچ کی ضرورت نہیں لیکن مریم نواز جیسےامیچورکبھی کھلاڑی نہیں بن سکتے کوچ چاہے جتناکوالیفائیڈ ہو، مریم اور بلاول ابو بچاؤ مہم سے لیڈر بننا چاہتے ہیں کوچ جو بھی ہوکھیل تو کھلاڑیوں نے کھیلنا ہے اوراس کی صلاحیت ان پلئرز میں نہیں
— Ch Fawad Hussain (@fawadchaudhry) September 15, 2022
ایک اور پی ٹی آئی رہنما بابر اعوان نے بھی مریم نواز پر تنقید کے لیے ٹوئٹر کا انتخاب کیا اور اپنے ٹوئٹ میں ان پر کڑی تنقید کی۔بابر اعوان نے اپنے ٹوئٹ میں معنی خیز انداز اختیار کرتےہوئے لکھا کہ اب گڈ ٹھگ اور بیڈ ٹھگ پھر ایکشن میں ہیں۔
سابق وفاقی وزیر نے مزید کہا کہ گڈ ٹھگ ہر روز کان پکڑ کر آئی ایم ایف کے سامنے ناک سے لکیریں نکالتا ہے جب کہ دوسری جانب بیڈ ٹھگ کی ڈیوٹی بڑھکیں مارنا اور دھمکیاں دینا ہے، لیکن اب مزید ایسے نہیں چلے گا۔
عمران خان کے کوچ پیچھے ہٹ جائیں تو عمران خان کو sort کرنا تین دنوں کا کام ہے۔ مریم نواز
“Good ٹھگ، Bad ٹھگ” پھر ایکشن میں ہے۔ Good ٹھگ ہر روز کان پکڑ کر آئی ایم ایف کے سامنے ناک سے لکیریں نکالتا ہے۔ Bad ٹھگ کی ڈیوٹی بڑھکیں مارنا اور دھمکیاں دینا ہے۔ ایسے نہیں چلے گا!
— Babar Awan (@BabarAwanPK) September 15, 2022
واضح رہے کہ مریم نواز نے اسلام آباد میں میڈیا سے گفتگو کرتے ہوئے پی ٹی آئی سربراہ اور سابق وزیراعظم عمران خان پر کڑی تنقید کی تھی۔
مریم نواز نے کہا تھا کہ عمران خان فتنہ، انتشار اور فارن فنڈڈ ہے جس کو پاکستان کی نئی نسل کو تباہ کرنے کیلئے ڈالر دے کر لانچ کیا گیا اور وہ ملکی معیشت کی تباہی کے لیے لینڈ مائنز بچھا کر چلا گیا۔ اس کے دباؤ پر کوئی فیصلے نہیں ہونے چاہئیں۔