ملک میں موسم سرما کا آغاز ہو گیابرفباری اور بارش سے سردی میں اضافہ

اسلام آباد (قدرت روزنامہ)موسم سرما کا آغاز ہوتے ہی ملک کے مختلف شہروں میں بارش، ژالہ باری اور برف باری نے سردی کی شدت میں اضافہ کر دیا ہے۔تفصیلات کے مطابق آزاد کشمیر میں مظفر آباد، وادی نیلم، ہٹیاں بالا، ضلع حویلی، وسطی اور جنوبی اضلاع سمیت لیپا ویلی کے

پہاڑوں پر بارش اور برفباری کا سلسلہ وقفہ وقفہ سے جاری رہا ،شمالی پہاڑ گنگا چوٹی پر ہلکی برفباری کے بعد سردی کی شدت میں اضافہ ہوگیا ۔گلگت بلتستان کے ضلع دیامر اور استور کے بالائی علاقوں میں برف باری جبکہ چلاس میں وقفے وقفے سے بارش ہوتی رہی ہنزہ کے پہاڑوں پر برفباری ،نشیبی علاقوں میں ہلکی بارش سے سردی بڑھ گئی ہے۔وادی کالام کے بالائی علاقوں گبرال، اتروڑ اور مہوڈھنڈ میں وقفے وقفے سے برفباری جاری رہی، بنوں میں بارش کے بعد موسم سرد ہوگیا جس کے بعد گرم ملبوسات، خشک میوہ جات اور مچھلی کی فروخت میں اضافہ ہوگیا ۔بلوچستان کے شمالی علاقوں میں بارش اور ژالہ باری کا سلسلہ وقفے وقفے کے ساتھ جاری رہا، ہرنائی، زیارت، سنجاوی، کان مہترزئی، توبہ اچکزئی کے پہاڑی علاقوں میں کہیں بارش تو کہیں تیز ژالہ باری سے معمولات زندگی متاثر ہیں، یخ بستہ ہوائیں چلنے سے بے گھر متاثرین کو سخت مشکلات کا سامنا کرناپژا ۔خضدار، اوتھل، بیلہ کے مختلف علاقوں میں موسم سرما کی پہلی بارش ہوئی جبکہ سندھ کے علاقوں ٹھٹھہ اور سجاول میں بھی ہلکی بارش کے بعد موسم خوشگوار ہوگیا ہے۔