اب ہمارا امتحان شروع ہوگیا، ہمیں ایک دوسرے کو سنبھالنا ہوگا، محمود اچکزئی

کوئٹہ (قدرت روزنامہ)صدر مملکت کے لیے سنی اتحاد کونسل کے امیدوار محمود اچکزئی نے کہا ہے کہ ایک پارٹی کو پاکستان کے عوام نے ووٹ دیے ہیں، ہمیں اس بات کو ماننا پڑے گا۔
صدر مملکت کے انتخاب میں آصف زرداری بھاری اکثریت سے کامیاب ہو گئے ہیں۔ محمود اچکزئی نے مدمقابل امیدوار کو جیت کی مبارکباد پیش کی۔
صدارتی انتخابات کے نتائج کے بعد میڈیا سے گفتگو کرتے ہوئے محمود اچکزئی نے کہاکہ اب ہمارا امتحان شروع ہو گیا ہے۔ خطے اور دنیا میں جو کچھ ہو رہا ہے ہمیں اس پر نظر رکھنا ہوگی۔
انہوں نے کہاکہ ہمیں اب ایک دوسرے کو سنبھالنا ہے، ہم پارلیمان کے مسئلے کیوں عدالتوں میں لے کر جائیں۔ نواز شریف اپنی پارٹی کے سمجھدار لوگوں کی بات سنیں۔
محمود اچکزئی نے کہاکہ یہ پہلا صدارتی الیکشن ہے جس میں کوئی خرید و فروخت نہیں ہوئی۔
انہوں نے کہاکہ صدارتی امیدوار نامزد کرنے اور ساتھ دینے پر پی ٹی آئی کا مشکور ہوں، بہت سے لوگوں نے مجھے کہاکہ ووٹ تو آپ کو دینے کی خواہش تھی لیکن حکم کہیں اور کا ہے۔
محمود اچکزئی نے کہاکہ خیبرپختونخوا اسمبلی میں تمام 90 ارکان نے مجھے ووٹ دیا۔ ڈاکٹر عبدالمالک رات تک ہمیں ووٹ دینے پر قائل تھے مگر پھر پھسل گئے۔
انہوں نے جمعیت علما اسلام (ف) سے شکوہ کرتے ہوئے کہاکہ مولانا فضل الرحمان کا ووٹ ہمیں پڑنا چاہیے تھا۔