وزیراعظم نے وفاقی کابینہ کی مجوزہ فہرست صدر مملکت کو بھجوا دی، حلف برداری آج متوقع

اسلام آباد (قدرت روزنامہ)آصف علی زرداری کی جانب سے دوسری بار صدارت کا منصب سنبھالنے کے بعد توقع کی جا رہی ہے کہ وفاقی کابینہ بھی آج حلف اٹھائے گی .
اس سلسلے میں، وزیراعظم شہباز شریف نے وفاقی کابینہ کی تشکیل کے لیے مشاورت مکمل کرنے کے بعد وفاقی کابینہ شامل ارکان کی تقرری کے لیے حتمی فہرست صدر مملکت آصف علی زرداری کو بھجوا دی ہے .

متحدہ قومی موومنٹ، استحکام پاکستان پارٹی اور پاکستان مسلم لیگ (ق) کو بھی وفاقی کابینہ میں شامل کرنے کا فیصلہ کیا گیا ہے .
وزیراعظم کی جانب سے بھجوائی گئی فہرست کے مطابق، وفاقی کابینہ میں خواجہ محمد آصف، احسن اقبال، رانا تنویر حسین، اعظم نذیر تارڑ، چوہدری سالک حسین، عبدالعلیم خان، انجینئر امیر مقام، سردار اویس احمد خان لغاری، ڈاکٹر خالد مقبول صدیقی، قیصر احمد شیخ، ریاض حسین پیرزادہ، اسحٰق ڈار، مصدق مسعود ملک، محمد اورنگزیب، احد خان چیمہ اور محسن رضا نقوی شامل ہیں . وزیراعظم نے شزا فاطمہ خواجہ کا نام وزیر مملکت کے طور پر تجویز کیا ہے .
اسحٰق ڈار وزیر خارجہ اور محسن نقوی وزیر داخلہ ہوں گے؟
نئی کابینہ میں اسحاق ڈار کو وزارت خارجہ، اعظم تارڑ کو وزارت قانون اور عطااللہ تارڑ کو وزارت اطلاعات، احسن اقبال کو وزارت منصوبہ بندی، خواجہ آصف کو وزارت دفاع، سابق نگران وزیراعلیٰ پنجاب محسن نقوی کو وزارت داخلہ، محمد اورنگزیب کو وزارت خزانہ اور مصدق ملک کو پیٹرولیم کا قلمدان دیے جانے کا امکان ہے .
ایم کیو ایم کو 2 وزارتیں ملیں گی
نئی کابینہ میں استحکام پاکستان پارٹی اور مسلم لیگ (ق) کو بھی شامل کیا گیا ہے جبکہ مشاورت کے بعد فیصلہ کیا گیا کہ متحدہ قومی موومنٹ (ایم کیو ایم) کو بھی وفاقی کابینہ میں 2 وزارتیں دی جائیں گی .
میڈیا رپورٹس کے مطابق، مشاورت کے دوران طارق فاطمی کو معاون خصوصی برائے خارجہ اور احد چیمہ کو مشیر برائے اسٹیبلشمنٹ ڈویژن بنانے کا فیصلہ کیا گیا ہے جبکہ جام کمال بھی وفاقی کابینہ میں شامل ہوں گے .