زائرہ وسیم نے 2 سال بعد برقع میں پہلی تصویر شیئر کردی
کم عمری میں محض ایک ہی فلم سے شہرت کی بلندیوں پر پہنچنے والی زائرہ وسیم نے جب جولائی 2019 میں سوشل میڈیا پوسٹس کے ذریعے مذہب کی خاطر شوبز چھوڑنے کا اعلان کیا تھا تو کئی شخصیات حیران رہ گئی تھیں . اور شوبز چھوڑے جانے کے دو سال دو ماہ بعد زائرہ وسیم نے انسٹاگرام پر اپنی پہلی تصویر شیئر کی تو چند ہی گھنٹوں میں ہزاروں افراد نے ان کی تصویر کو لائیک کیا . زائرہ وسیم نے برقع میں ملبوس اپنی تصویر کو صرف انسٹاگرام پر شیئر کیا، اسے فیس بک اور ٹوئٹر پر شیئر نہیں کیا . تصویر میں سابق اداکارہ کا چہرہ دکھائی نہیں دیتا اور انہیں خوبصورت سیاحتی مقام پر لوہے کے بنے پل پر سیاہ برقعے میں دیکھا جا سکتا ہے . انہوں نے تصویر کے کیپشن میں ماہ اکتوبر کی دھوپ کی خوبصورتی کا ذکر کیا . زائرہ وسیم کی تصویر کو ان کی 'دنگل' فلم کی ساتھی اداکارہ فاطمہ ثنا شیخ سمیت دیگر بولی وڈ شخصیات نے بھی لائیک کیا جب کہ درجنوں مداحوں نے کمنٹس میں ان کے لیے نیک خواہشات کا اظہار کیا . کئی لوگوں نے ان کی جانب سے تصویر شیئر کیے جانے پر چہ مگوئیاں شروع کیں کہ اب وہ جلد ہی دوبارہ فلموں میں آئیں گی، تاہم کئی افراد نے یہ بھی لکھا کہ زائرہ وسیم کی فلموں میں واپسی ناممکن دکھائی دیتی ہے . . .
