بلوچستان کے حصے کے پانی کی عدم فراہمی سے کاشتکاروں کو مشکلات کا سامنا ہے، صوبائی وزیر صحت
گنداخہ(قدرت روزنامہ)کیر تھر کینال میں بلوچستان کے حصے پانی شدید کمی اور کاشتکاروں کے مسائل کے حل کیلیے کراچی سے صوبائی وزیر صحت سردارزادہ فیصل خان جمالی کے ہمراہ صوبائی وزیر ایریگیشن سندھ جام خان شورو نے سکھر بیراج کا دورہ کیا دورے کے موقع پر سکھر بیراج کے چیف انجینئر منصور میمن نے انہیں پانی کی فراہمی کے حوالے سے بریفنگ دی اس موقع پر سردار محمد ہارون خان جمالی میر۔نوریز خان جمالی سربراہ میر ذوالفقار خان جمالی میر ندیم خان جمالی نوابزادہ سالار خان جمالی ایگزیکٹو انجینیئر کیرتھر کینال گل حسن کھوسہ خیر بخش لاشاری زمیندار ایسوسی ایشن کے رہنما موجود تھے صوبائی وزیر صحت سردارزادہ فیصل خان جمالی نے انہیں آگاہی فراہم کرتے ہوئے بتایا کہ کیر تھر کینال میں بلوچستان کے جائز حصے کے پانی کی عدم فراہمی سے کاشتکاروں کو مشکلات کا سامنا کرنا پڑ رہا ہے جس کا تدارک کرنا وقت کی ضرورت بن چکا ہے سندھ حکومت بلوچستان کو گھڑنگ کے مقام کے بجائے خانکی کی حدود میں پانی کی فراہمی یقینی بنائے تاکہ بلوچستان کا علاقہ سیراب کیا جائے اس وقت کاشتکار اور زمیندارن سخت مشکلات سے دوچار ہیں اگر بلوچستان کو اپنے جائز حصے کا پانی فراہم کیا گیا تو کیرتھر کینال سے بلوچستان کا وسیع و عریض رقبہ سیراب ہوسکتا ہے جس سے نہ صرف کسان خوشحال ھونگے بلکہ ملک کے لئے زرمبادلہ بھی حاصل کیا جا سکتا ہے اس موقع پر صوبائی وزیر ایریگیشن سندھ جام خان شورو نے صوبائی وزیر صحت سردار زادہ فیصل خان جمالی سمیت دیگر زمینداروں اور ان کے نمائندگان کو یقین دلایا کہ بلوچستان کو اپنے جائز حصے کا پانی فراہم کیا جائے گا اور اس کی مانیٹرنگ بھی تھرڈ پارٹی سے کروائی جائے گی تاکہ تمام خدوخال عیاں ہو کر سامنے آئیں ہمیں بخوبی احساس ہے کہ اس وقت زرعی پانی کی کمی کی وجہ سے کیرتھر کینال بلوچستان کے کاشتکاروں کو مشکلات کا سامنا ہے مگر سندھ حکومت اپنے بلوچستان کے بھائیوں کی مشکلات کو مدنظر رکھ کر بہتر سے بہتر اقدامات کو یقینی بنائے گی تاکہ بلوچستان کے کاشتکاروں کے مسائل کا تدارک کیا جا سکے۔