رمضان المبارک کے دوران سرکاری دفاتر کے اوقات کار کیا ہوں گے؟

اسلام آباد (قدرت روزنامہ)وفاقی حکومت نے رمضان المبارک کے دوران سرکاری دفاتر کے اوقات کار کا باضابطہ اعلان کر دیا ہے، نظرثانی شدہ اوقات کا مقصد کام کے موثر آپریشن کو برقرار رکھتے ہوئے ملازمین کو رمضان میں سہولت فراہم کرنا ہے۔
سرکاری دفاتر جو ہفتے میں 5 دن کام کے اوقات کار پر عمل پیرا ہیں وہاں رمضان المبارک کے دوران پیر سے جمعرات تک صبح 9 سے شام 3 بجے تک جبکہ جمعہ کو صبح 9 سے 12:30 بجے تک اوقات کار ہوں گے۔
حکومت سرکاری ملازمین کی حوصلہ افزائی کرتی ہے کہ وہ ان اوقات کار کو مؤثر طریقے سے استعمال کریں اور رمضان کی خصوصی اہمیت کو مدنظر رکھتے ہوئے انتظامی کاموں کو ہموار کرنے کو یقینی بنائیں۔
ہفتے میں 6 دن کاروبار کرنے والے دفاتر کے اوقات کار پیر سے جمعرات اور ہفتہ کو صبح 9 سے دوپہر 2 بجے تک رہیں گے جو جمعہ کو مزید کم ہوکر صبح 9 سے 12:30 بجے تک ہوجائیں گے۔
یہ ایڈجسٹمنٹ پیشہ ورانہ ذمہ داریوں اور مذہبی عبادات کے درمیان توازن کو یقینی بنانے کے لیے حکومت کے عزم سے مطابقت رکھتی ہیں۔ یہ کم کام کے اوقات ملازمین کو اپنی روحانی ذمہ داریوں کو، بشمول روزہ اور نماز اپنے سرکاری فرائض کو موثر انداز میں جاری رکھتے ہوئے پورا کرنے کی اجازت دیتے ہیں۔
رمضان، اسلامی کیلنڈر کا 9واں مہینہ، دنیا بھر کے مسلمانوں کے لیے سال کا ایک مقدس وقت ہے، متحدہ عرب امارات، سعودی عرب اور دیگر سمیت بہت سے ممالک اس عرصے کے دوران اپنی افرادی قوت کی مدد کے لیے کام کے اوقات میں کمی کا نفاذ کرتے ہیں۔