خضدار: تحصیل نال میں دھماکہ، 4 افراد ہلاک، 5 زخمی

خضدار(قدرت روزنامہ) خضدار کی تحصیل نال میں نامعلوم افراد کی جانب سے دھماکہ خیز مواد سے حملہ کیا گیا جس کے نتیجے میں 4 افراد ہلاک جبکہ 5 افراد زخمی ہو گئے ہیں۔ مقامی انتظامیہ کے مطابق، ہلاک ہونے والوں میں صمد سمالانی کا نام شامل ہے جو شدید زخمی ہیں۔
تفصیلات کے مطابق، صمد سمالانی اپنی گاڑی کو ویلڈنگ کی دکان پر مرمت کروا رہے تھے، کہ اچانک موٹر سائیکل پر نصب دھماکہ خیز مواد کو اڑا دیا گیا۔ اس دھماکے میں 2 راہ گیر بھی ہلاک ہوئے ہیں، جن میں عبیداللہ ولد لعل بخش اور منیر احمد ولد عبدالغنی شامل ہیں۔
ڈپٹی کمشنر خضدار یاسر اقبال دشتی کے مطابق، واقعے کے فوراً بعد لیویز فورس موقع پر پہنچ گئی اور زخمیوں کو ہسپتال منتقل کیا گیا۔ زخمیوں میں سے ایک کو ٹراما سینٹر جبکہ باقی کو مقامی ہسپتال منتقل کر دیا گیا ہے۔ مزید علاج کے لئے خضدار لانے کے انتظامات کیے جا رہے ہیں۔
اس واقعے کے بعد مقامی انتظامیہ نے تحقیقات شروع کر دی ہیں، تاہم ابھی تک کسی گروہ یا فرد نے حملے کی ذمہ داری قبول نہیں کی۔