وزیر توانائی اویس لغاری نے عوام کو ایک اور ریلیف کی خوشخبری دے دی

اسلام آباد (قدرت روزنامہ)وفاقی وزیر توانائی اویس لغاری نے بجلی کی قیمت میں مزید کمی کی خوشخبری سناتے ہوئے کہا ہے کہ جن کمپنیوں سے معاہدے ہوئے تھے ان سے ابھی بات چیت جاری
ہے اور بات بننے کی صورت میں عوام کو ایک بار پھر ریلیف فراہم کردیا جائے گا۔
نجی ٹی وی کے ایک پروگرام میں گفتگو کرتے ہوئے وزیر توانائی اویس لغاری نے بتایا کہ چینی پلانٹس سمیت 68 پلانٹس کے ساتھ بات چیت آج بھی جاری ہے اور چائنیز کے ساتھ ڈیٹ ری پروفائلنگ پر بھی کام ہو رہا ہے جبکہ ونڈ ، سولر اور حکومت کے کچھ پلانٹس سے بھی گفتگو ہو رہی ہے اور جب ان کے ساتھ معاہدوں پر نظرثانی مکمل ہوجائے گی اور اس سے جو فائدہ ہوگا اسے عوام تک پہنچایا جائے گا۔
اویس لغاری نے کہا کہ ہمارا فرض ہے کہ جو بوجھ اٹھا سکتے ہوں وہ اٹھائیں۔ انہوں نے مزید کہا کہ ریلیف دینے کے لیے ہمارے پاس مالی وسائل نہیں ہیں لیکن وزیراعظم کی قیادت میں ایک سال میں اصلاحات شروع کیں، آئی پی پیز کے ساتھ معاہدوں پر نظرثانی شروع کی جس کے باعث بجلی کی قیمت میں 7 روپے 41 پیسے کمی ہوئی۔
وفاقی وزیر توانائی نے کہا کہ ہمارے اصلاحاتی عمل سے عالمی پارٹنرز کو اعتماد ملا اور پاور ڈویژن میں اصلاحات سے آئی ایم ایف کو قائل کر سکے۔
اویس لغاری نے کہا کہ ہم بینکوں کے ساتھ ایک معاہدے کے قریب ہیں، آئی پی پیز کے ساتھ لیٹ پیمنٹ چارجز میں ہمیں کئی سو ارب کی بچت ہوئی اور ہم نے عوام پر سے بجلی کی قیمتوں کا بوجھ ہٹا کر دکھایا۔
انہوں نے کہا کہ ہم تمام اسٹیک ہولڈرز کے ساتھ اگلے ہفتے سے بات چیت شروع کریں گے۔