پی آئی اے نے لاہور سے باکو کے لیے براہِ راست پروازیں شروع کرنے کا اعلان کردیا

کراچی(قدرت روزنامہ)قومی ایئرلائن پی آئی اے نے 20 اپریل 2025 سے لاہور سے آذربائیجان کے دارالحکومت باکو کے لیے براہِ راست پروازیں شروع کرنے کا اعلان کیا ہے۔

ابتدائی طور پر ہفتہ وار دو پروازوں سے آغاز کیا جائے گا جو ہر اتوار اور بدھ کے روز لاہور سے روانہ ہوں گی۔اس نئے روٹ کے آغاز کے حوالے سے پی آئی اے کی جانب سے کراچی میں ٹریول ایجنٹس اور ٹور آپریٹرز کے اعزاز میں ایک خصوصی تقریب کا انعقاد کیا گیا جس کا مقصد باکو پروازوں کے بارے میں آگاہی فراہم کرنا اور مارکیٹ میں ان نئی پروازوں کو فروغ دینا تھا۔

تقریب کے دوران ٹریول ایجنٹس کو باکو کے روٹ کی اہمیت، پروازوں کے شیڈول اور سہولیات سے متعلق تفصیلی معلومات فراہم کی گئیں۔ مقررین نے کہا کہ باکو پروازیں نہ صرف سیاحت کے شعبے کو فروغ دیں گی بلکہ دونوں ممالک کے درمیان تجارتی روابط میں بھی اضافہ ہوگا۔باکو روٹ کو کاروباری اور سیاحتی لحاظ سے کامیاب بنانے کے لیے ٹریول ایجنٹس کا کردار کلیدی ہے اور پی آئی اے اس روٹ کی کامیابی کے لیے ہر ممکن کوشش کرے گا.