کیا واقعی ’’کیا موٹرز‘‘ نے اسپورٹیج ایل کی قیمت میں لاکھوں روپے کی کمی کردی ہے؟

کراچی (قدرت روزنامہ)پاکستانی آٹومارکیٹ کے حلقوں کو حال ہی میں ایک اطلاع نے ہلا کر رکھ دیا کہ ’’کیا لکی موٹرز‘‘ نے کیا اسپورٹیج ایل 2.0 ایل ایف ڈبلیو ڈی ویرینٹ کی قیمت میں پورے 10 لاکھ روپے کی کمی کردی ہے۔
یہ خبر سوشل میڈیا پر ایک بظاہر ’’سرکاری‘‘ نوٹیفکیشن کے ساتھ گردش کرنے لگی تھی۔ تاہم اب اس حوالے سے وضاحتی خبر سامنے آگئی ہے، جس سے اس اطلاع کی حقیقت کھل گئی ہے۔
یہ شور اس وقت شروع ہوا جب ہنڈائی پاکستان نے ٹکسن ہائبرڈ 2025ء لانچ کی، جو ایس یو وی سیگمنٹ میں ایک سنجیدہ چیلنج کے طور پر سامنے آئی، اس کی اسمارٹ ویرینٹ کی قیمت ایک کروڑ 10 لاکھ 99 ہزار روپے اور سگنیچر کی قیمت ایک کروڑ 19 لاکھ 99 ہزار روپے مقرر کی گئی تھی، جو کیا کی ہائبرڈ اور نان ہائبرڈ اسپورٹیج ماڈلز سے نمایاں طور پر کم تھیں۔
اس سے قیاس آرائیوں نے جنم لیا کہ کیا لکی موٹرز بھی اپنی فلیگ شپ ایس یو وی کی قیمتیں کم کرے گا تاکہ مارکیٹ میں مقابلہ قائم رکھ سکے۔
کیا پاکستان نے گردش کرتی قیمتوں کی فہرست پر فوری ردعمل دیا اور اسے واضح طور پر ’’جعلی‘‘ قرار دیا۔ کمپنی نے ایک آفیشل بیان جاری کیا اور عوام سے درخواست کی کہ وہ اس قسم کی غلط معلومات پر یقین نہ کریں اور نہ ہی انہیں پھیلائیں اور اس بات کا اعادہ کیا کہ کوئی سرکاری قیمت میں کمی کا اعلان نہیں کیا گیا۔
ٹوسان ہائبرڈ بمقابلہ اسپورٹیج ایل: قیمت کا موازنہ
اسپورٹیج ایل کی قیمتیں:
اسپورٹیج ایل الفا – 94,99,000 روپے
اسپورٹیج ایل 2.0 ایل ایف ڈبلیو ڈی – 1,18,25,000 روپے
کیا اسپورٹیج ایل HEV – 1,28,50,000 روپے
ٹوسان ہائبرڈ 2025 کی قیمتیں:
ٹوسان ہائبرڈ اسمارٹ – 1,10,99,000 روپے
ٹوسان ہائبرڈ سگنیچر – 1,19,99,000 روپے
اگرچہ قیمتوں میں بھاری کمی کا خیال پرکشش لگتا ہے، خاص طور پر آج کی غیر مستحکم آٹوموٹیو مارکیٹ میں، مگر ایسے کسی بھی دعوے کی تصدیق ہمیشہ سرکاری ذرائع سے کرنا ضروری ہے۔
اب تک، کیا نے اسپورٹیج ایل کی قیمت میں کوئی تبدیلی نہیں کی ہے اور جو دستاویز وائرل ہوئی ہے وہ محض ایک افواہ ہے۔