عوام کا پیسہ باہر لے جانے والوں سے ہرگز بات نہیں ہوگی، وزیر اعظم
مہنگائی کی وجوہات بتاتے ہوئے وزیر اعظم نے کہا کہ ہمارا مسئلہ یہ ہے کہ تیل، کوئلے اور گھی کی قیمتیں عالمی سطح پر بڑھی تو پاکستان میں بھی ان کی قیمتیں بڑھیں . دنیا میں 3 سے 4 ماہ میں قیمتیں نیچے آنے لگیں گی تو پاکستان میں بھی ان کی قیمتیں کم ہونے لگیں گی . مہنگائی کے خلاف ہم ایک پیکیج لارہے ہیں جس کے تحت مستحق لوگوں کو آٹا ، دالیں اور دیگر چیزوں میں سبسڈی ملے گی . وزیر اعظم نے مزید کہا کہ 20 لاکھ کمزور خاندانوں کے لیے بلاسود قرضے دے رہے ہیں، اپنا گھر بنانے کے لیے 27 لاکھ روپے بلاسود قرض فراہم کیا جائے گا . وزیر اعظم نے کہا کہ پاکستان ایک عظیم خواب کا نام تھا، اسی خواب کی بنیاد پر پاکستان کو عظیم قوم بناؤں گا، مشکل وقت سب پر آتا ہے، آزادی کے بعد بھی ہم آزادی سے فیصلے نہیں کرسکتے تھے، ہمیں کبھی کسی کی غلامی کرنی پڑی تو کبھی کسی کی . وعدہ ہے پاکستان وہ ملک بنے گا جو کسی کے سامنے نہیں جھکے گا، اب ہم وہی فیصلے کریں گے جو عوام کے مفاد میں ہوں . وزیراعظم نے مزید کہا کہ ہم پاکستان میں مختلف نظریات کے حامل تمام لوگوں سے بات کرنے کو تیار ہیںم چاہے بلوچستان کے ناراض لوگ ہوں یا قبائلی علاقے کے لوگ، ہم سب سے بات کریں گے، لیکن عوام کا پیسہ چوری کرکے بیرون ملک لے جانے والوں سے کبھی مفاہمت نہیں کریں گے . میری حکومت انہیں کبھی این آر او نہیں دے گی . بڑے ڈاکوؤں سے ڈیل کرنے والی قوم تباہ ہوجاتی ہے . ہر مہذب معاشرہ چوروں سے ڈیل نہیں کرتا . خوشحال ملکوں میں قانون کی بالادستی ہے، غریب ملکوں میں طاقتور باہر اور غریب جیلوں میں ہوتے ہیں . قانون کی حکمرانی اور فلاحی ریاست کے اصولوں پر پاکستان کو اٹھائیں گے . . .
