وزیراعلیٰ بلوچستان کا وزیر اعظم کی جانب سے گوادر تحریک کے مطالبات کا نوٹس لینے کا خیر مقدم
انہوں نے کہا کہ صوبائی حکومت اپنی پالیسی اور گوادر تحریک کے مطالبات کے تحت بیشتر اقدامات پر عمل درآمد کر رہی ہے، صوبائی حکومت کے دائرہ کار میں آنے والے مطالبات پر تیزی سے پیش رفت جاری ہے . ان کا کہنا تھا کہ متعلقہ صوبائی محکمے غیر قانونی ماہی گیری اور ٹرالنگ کی روک تھام یقینی بنا رہے ہیں، غیر ضروری چیک پوسٹوں کو ختم کر دیا گیا ہے، سرحدی تجارت کا آغاز اور ٹوکن سسٹم کو ختم کردیا گیا ہے . وزیر اعلیٰ بلوچستان نے کہا کہ گوادر میں شراب خانوں کے لائسنس منسوخ کر دیئے گئے ہیں، محکمہ پی ایچ ای کو گوادر شہر میں پانی کے مسائل کے فوری حل کے لئے فنڈز کا اجراء کیا گیا ہے، گوادر اولڈ ٹاؤن کی ترقی کی منصوبہ بندی اور فنڈز فراہم کئے جا رہے ہیں . ان کا کہنا تھا کہ بجلی سمیت بعض دیگر مطالبات کا تعلق وفاقی حکومت سے ہے، وزیراعظم کی مطالبات کے حوالے سے یقین دہانی سے وفاق سے متعلق مطالبات بھی حل ہوں گے، متعلقہ وفاقی و صوبائی محکمے اور ادارے غیر قانونی ٹرالنگ کے سدباب کے لئے مزید مربوط و موثر اقدامات کریں گے . وزیر اعلیٰ بلوچستان میر عبد القدوس بزنجو نے مزید کہا کہ وفاقی اور صوبائی حکومت سرحدی تجارت کے فروغ اور بارڈر مارکیٹوں کے منصوبے کی جلد تکمیل یقینی بنائیں گی، گوادر تحریک کے مطالبات پر پیش رفت کے حوالے سے وزیر اعظم کو مفصل رپورٹ پیش کریں گے . واضح رہے کہ وزیر اعظم عمران خان نے گوادر کے ماہی گیروں کے مطالبات کا نوٹس لے لیا ہے . سماجی رابطے کی ویب سائٹ ٹوئٹر پر جاری اپنی ٹوئٹ میں وزیر اعظم نے کہا کہ میں نے گوادر کے محنتی ماہی گیروں کے انتہائی جائز مطالبات کا نوٹس لیا ہے . انہوں نے مزید کہا کہ گوادر میں ٹرالروں سے غیر قانونی ماہی گیری کے خلاف سخت ایکشن لیں گے اور وزیر اعلیٰ بلوچستان سے بھی اس حوالے سے بات کریں گے . . .
