صوبائی دارلحکومت میں تمام کارخانوں، مارکیٹوں، شاپنگ مالز اور دکانوں پر کام کرنے والوں کو 5جنوری تک ویکسی نیشن کروانا ہوگی
5جنوری کے بعد اگر کہیں کوئی ویکسی نیشن کے بغیر کام کرتا پایا گیا تو وہ کارخانہ، شاپنگ مال اور دکان سیل ہوگی . صوبائی وزیر صنعت وتجارت میاں اسلم اقبال نے اجلاس سے خطاب کرتے ہوئے کہا کہ ویکسی نیشن مہم میں لاہور کے تمام ٹانز کی تحریک انصاف کی قیادت اور کمیونٹی کو شامل کیا جائے گا . اس کے ساتھ ساتھ صنعتکاروں، ایوان صنعت وتجارت اور تاجروں کو بھی مہم میں شامل کیا جائے گا . انہوں نے کہا کہ صوبائی دارلحکومت میں محکمہ صحت کی ٹیمیں متحرک ہیں،عوام کورونا سے محفوظ رہنے کے لئے ویکسی نیشن کروائیں . صوبائی وزیر نے کہا کہ تعطیلات کے بعد تعلیمی اداروں کے کھلنے پر وہاں بھی ویکسی نیشن کے عمل کا جائزہ لیا جائے گا . نجی وسرکاری تعلیمی اداروں کے اساتذہ اور طلبا و طالبات کی ویکسی نیشن بھی لازم ہے . تعلیمی اداروں میں ویکسی نیشن کا عمل مکمل نہ کرنے والے ادارے کوبھی بند کر دیا جائے گا . صوبائی وزیر نے ہدایت کی کہ جہاں ویکسی نیشن کی شرح کم ہے وہاں مہم کو مزید تیز کیا جائے . شاہدرہ، چونگی امرسدھو اور لاہور کے دیگر گنجان آباد علاقوں میں ویکسی نیشن مہم پر خصوصی توجہ دی جائے . میاں اسلم اقبال نے کہا کہ وزیر اعلی نے لاہور میں ویکسی نیشن کے ہدف کے حصول کی جو ذمہ داری دی ہے اسے پورا کروں گا . محکمہ صحت کے حکام نے لاہور میں جاری ویکسی نیشن مہم پربریفنگ دیتے ہوئے بتایا کہ صوبائی دارلحکومت میں ویکسی نیشن مہم کے تحت محکمہ صحت کی ٹیمیں لوگوں کو گھر گھر جاکر ویکسینیٹ کر رہی ہیں . سی ای او ہیلتھ لاہور ڈاکٹر فیصل ملک، اے ڈی سی (جی)شاہد کاٹھیا،محکمہ پرائمری اینڈ سیکنڈری ہیلتھ کے خالد شریف اور متعلقہ افسران نے اجلاس میں شرکت کی . . .
