مسلم لیگ ن کے رہنما محمد زبیر نے من پسند چینلز میں اشتہارات کی تقسیم کا اعتراف کر لیا
اسلام آباد (قدرت روزنامہ) نجی ٹی وی چینل اے آر وائی نیوز کے پروگرام میں بات کرتے ہوئے مسلم لیگ ن کے سینئیر رہنما اور سابق گورنر سندھ محمد زبیر نے من پسند ٹی وی چینلز کو اشتہارات دینے کا اعتراف کر لیا۔ پروگرام میں گفتگو کے دوران محمد زبیر نے کہا کہ اینکرز ن لیگ حکومت کے خلاف کنٹینر پر کھڑے ہو کر بیانات دے رہےتھے ایسی صورت ہم ٹی وی چینلز کو اشتہارات کیسےدیتے؟ پروگرام کے میزبان وسیم بادامی نے جواب میں کہا کہ مطلب ن لیگ کی تعریف کرنے والے اینکرز کو دیکھ کر اشتہارات دیئےگئے؟ جس پر محمدزبیر نے کہا کہ جن چینلز کی ریٹنگ کم تھی ان کو ہم نےاشتہارات نہیں دیئے۔
خیال رہے کہ گذشتہ برس نومبر میں پاکستان مسلم لیگ ن کی نائب صدر مریم نوازصفدر کی آڈیو سوشل میڈیا پر وائرل ہوئی تھی جس میں انہوں نے اپنی پارٹی کو 4 بڑے نجی چینلز کا بائیکاٹ کرنے کی ہدایات دی تھیں۔
انہوں نے آڈیو میں چار ٹی وی چینلز کا نام لیتے ہوئے کہا کہ ان چینلز کو کسی بھی قسم کا بالکل کوئی بھی ایڈنہیں بھیجا جائے گا۔ مریم نواز کی اس آڈیو ٹیپ پر انہیں ہدف تنقید بنایا گیا جبکہ میڈیا کے کردار پر بھی سوال اُٹھائے گئے تھے جس کے بعد پاکستان مسلم لیگ ن کی ترجمان مریم اورنگزیب نے کہا کہ مریم نواز کی گفتگو پارٹی اشتہارات سے متعلق تھی، مریم نواز کی آڈیو پر طوفان برپا کرنے کی ضرورت نہیں، اُس آڈیو کا حساب دیں جس سے عدل کے ایوان کے ماتھے پر داغ لگا۔
مریم اورنگزیب نے مریم نواز کی آڈیو سے متعلق وضاحت کرتے ہوئے کہا کہ یہ پرانی آڈیو ہے جس پر مریم نواز نےجرات کے ساتھ سچ بولا۔ ترجمان مسلم لیگ ن نے کہا کہ پارٹی اشتہار سے متعلق فیصلہ پارٹی ہی کرتی ہے، مریم نواز نے آڈیو کو مانا اس میں چھپانے والی کوئی بات نہیں تھی۔