سعودی عرب میں گاڑیاں چوری کرنے والے 5 پاکستانی پکڑے گئے

ریاض (قدرت روزنامہ)سعودی عرب میں چوری کے الزام میں 5 پاکستانیوں کو گرفتار کرلیا گیا . سعودیہ کے المرصد اخبار کے مطابق ریاض پولیس نے ٹرک میں سے بھاری سامان اور گاڑیاں چوری کرنے والے 7 افراد کو گرفتار کیا ہے، اس ضمن میں ریاض پولیس کے میڈیا ترجمان نے بتایا کہ جرائم کی پیروی کے نتیجے میں 7 افراد کی گرفتاری عمل میں لائی گئی جن میں سے 5 پاکستانی شہریت کے رہائشی اور ٹرک چوری کرنے والے سوڈانی شہریت کے 2 شہری بھی شامل ہیں ، جو ورک ویزے کی خلاف ورزی میں بھی ملوث پائے گئے جنہوں نے بھاری سازوسامان چوری کیا اور گاڑیوں کے ڈھانچے میں ردوبدل کیا .

ملزمان نے اپنے جرائم کے ارتکاب کے لیے ریاض شہر میں ایک صنعتی ورکشاپ اور ایک صحرائی علاقے میں دو مقامات کرائے پر حاصل کیے جہاں سے 30 ٹرک ، 3 چوری شدہ گاڑیاں ، ٹوٹے ہوئے اسپیئر پارٹس کو ذخیرہ کرنے کے لیے سامان اور کنٹینرز پکڑے گئے ، ملزمان کو گرفتار کرنے کے بعد ان کے خلاف ابتدائی قانونی اقدامات کیے گئے اور انہیں پبلک پراسیکیوشن کے حوالے کر دیا گیا .

علاوہ ازیں سعودی عرب میں جعلی سرکاری دستاویزات بنا کر ہیر پھیر میں ملوث 8 پاکستانی پکڑے گئے ، ریاض پولیس نے 8 افراد پر مشتمل ایک ایسے گروہ کو گرفتار کیا ہے جو کہ جعلی سرکاری دستاویزات تیار کرتے تھے ان ملزمان کا تعلق پاکستان سے ہے ، جن کے بارے میں پولیس معلومات ملی تھیں کہ ریاض شہر میں نامعلوم افراد پر مشتمل ایک ایسا گروہ سرگرم ہے جو جعلی دستاویزات تیار کرکے انہیں فروخت کرتا ہے ، ملزمان کے بارے میں مکمل تفصیلات حاصل ہونے کے بعد ان کی گرفتاری عمل میں لائی گئی ہے .
اس حوالے سے ترجمان ریاض پولیس نے کہا ہے کہ ملزمان کی رہائش سعودی دارالحکومت ریاض میں تھی جہاں انہوں نے غیر قانونی سرگرمیوں کے لیے اپنے 2 ٹھکانے بنائے ہوئے تھے ، ان مقامات پر چھاپوں کے دوران ملزمان کے قبضے سے جعلی سرکاری شناختی دستاویزات تیار کرنے والے آلات ، پرنٹر اور دیگر اشیاء کے ساتھ رقم بھی برآمد کی گئی ، پولیس نے ملزمان کے خلاف جعل سازی کا مقدمہ درج کرکے انہیں متعلقہ ادارے کے حوالے کردیا ، جہاں تحقیقات مکمل ہونے کے بعد ان کا مقدمہ فوجداری عدالت کو بھیج دیا جائے گا .