آٹے کی قیمت میں کمی،شہریوں کو بڑا ریلیف مل گیا

کراچی (قدرت روزنامہ) کراچی میں آٹے کی قیمت کے حوالے سے شہریوں کے لیے خوش آئند خبر سامنے آئی ہے۔ شہر میں آٹے کی قیمتوں میں مسلسل اضافے کے بعد کمشنر کراچی کی مداخلت رنگ لے آئی، جس کے نتیجے میں فلور ملز ایسوسی ایشن نے ڈھائی نمبر آٹے کی قیمت میں کمی کا اعلان کر دیا ہے۔
ذرائع کے مطابق کمشنر کراچی اور فلور ملز ایسوسی ایشن کے درمیان ہونے والے اجلاس میں گندم کی بلا تعطل فراہمی اور قیمتوں کو مستحکم رکھنے پر اتفاق کیا گیا۔ اجلاس کے بعد فلور ملز نے ڈھائی نمبر آٹے کی ایکس مل قیمت میں 3 روپے فی کلو کمی کرتے ہوئے نئی قیمت 130 روپے فی کلو مقرر کر دی۔
آج سے نئی قیمت پر آٹا فروخت ہوگا
فلور ملز ایسوسی ایشن کا کہنا ہے کہ نئی قیمت کا اطلاق فوری طور پر کر دیا گیا ہے اور آج سے شہر بھر کی فلور ملز ایکس مل سطح پر آٹا 130 روپے فی کلو فروخت کریں گی۔ اس دوران گندم کی قیمت بھی کم ہو کر 121 روپے فی کلو تک آ گئی ہے، جس سے آٹے کی قیمت میں کمی ممکن ہوئی۔
پہلے قیمت کتنی تھی؟
چند روز قبل فلور ملز ایسوسی ایشن نے ڈھائی نمبر آٹے کی قیمت بڑھا کر 133 روپے فی کلو جبکہ فائن آٹے کی قیمت 149 روپے فی کلو مقرر کر دی تھی، جس پر شہریوں نے شدید تشویش کا اظہار کیا تھا۔
اعداد و شمار کے مطابق گزشتہ تین ماہ کے دوران ڈھائی نمبر آٹے کی قیمت میں 24 روپے فی کلو جبکہ فائن آٹے کی قیمت میں 31 روپے فی کلو اضافہ ریکارڈ کیا گیا۔
مزید اضافہ بھی ہو سکتا ہے؟
چکی مالکان کے مطابق انہیں گندم تقریباً 130 روپے فی کلو کے حساب سے فراہم کی جا رہی ہے۔ ان کا کہنا ہے کہ اگر آئندہ دنوں میں گندم کی قیمت دوبارہ بڑھی تو آٹے کی قیمتوں میں ایک بار پھر اضافہ ہو سکتا ہے۔
شہریوں نے حالیہ کمی کا خیر مقدم کرتے ہوئے مطالبہ کیا ہے کہ حکومت صرف عارضی نہیں بلکہ مستقل بنیادوں پر اشیائے خورونوش کی قیمتوں کو قابو میں رکھنے کے لیے مؤثر اقدامات کرے تاکہ عام آدمی کو حقیقی ریلیف مل سکے۔