سونے کی قیمت میں کمی، 15 اگست 2026 کو فی تولہ کتنے کا ہوگیا؟
کراچی (قدرت روزنامہ)ملک بھر میں سونے کی قیمت میں کئی روز مسلسل اضافے کے بعد نمایاں کمی ریکارڈ کی گئی، 14 اگست یومِ آزادی کی سرکاری تعطیل کے باعث صرافہ مارکیٹ کی نئی باقاعدہ قیمت سامنے نہیں آسکی۔ سونے کے جمعرات کو جاری کردہ یہ نرخ آج دوپہر تک برقرار رہیں گے۔
آل پاکستان جیمز اینڈ جیولرز ایسوسی ایشن کے مطابق جمعرات کو 24 قیراط سونے کی فی تولہ قیمت میں 3,500 روپے کی کمی ہوئی، جس کے بعد سونا 4 لاکھ 60 ہزار 436 روپے فی تولہ پر آگیا۔ اس سے پہلے سونے کی قیمت مسلسل اضافے کے باعث بلند سطح پر پہنچ گئی تھی۔
جیمز اینڈ جیولرز ایسوسی ایشن کے مطابق 10 گرام سونے کی قیمت بھی 3,001 روپے کم ہوئی، جس کے بعد اس کا بھاؤ 3 لاکھ 94 ہزار 749 روپے ہوگیا۔ مقامی مارکیٹ میں سونے کے نرخ عالمی قیمت، پاکستانی روپے کی قدر، مقامی طلب اور عالمی معاشی حالات سمیت مختلف عوامل سے متاثر ہوتے ہیں۔
دوسری جانب عالمی مارکیٹ میں جمعہ کو سونے کی قیمت میں اتار چڑھاؤ جاری رہا۔ عالمی سطح پر سرمایہ کاروں کی جانب سے حالیہ تیزی کے بعد منافع حاصل کرنے کے لیے فروخت نے سونے کی قیمت پر دباؤ ڈالا، جبکہ امریکی شرح سود اور ڈالر کی سمت بھی مارکیٹ کے لیے اہم عوامل رہے۔
میڈیا رپورٹس کے مطابق عالمی مارکیٹ میں اسپاٹ گولڈ جمعہ کو تقریباً 4,326.75 ڈالر فی اونس تک آگیا تھا، جبکہ بعد میں قیمت میں کچھ بحالی بھی دیکھی گئی۔ماہرین کا ماننا ہے کہ بین الاقوامی مارکیٹ میں سونے کی خریدوفروخت کا رجحان تاحال مستحکم نہیں، توقع کی جارہی ہے کہ عالمی معاشی اعدادوشمار اور شرح سود سے متعلق توقعات کے باعث سونے کی عالمی قیمت میں کسی بھی وقت کمی بیشی ہوسکتی ہے۔
