ملائیشین وزیراعظم نے بھارت کا پروپیگنڈا مٹی میں ملا دیا، نیا دہلی عالمی سطح پر بے نقاب ہو چکا ہے، بلاول بھٹو زرداری

اسلام آباد(قدرت روزنامہ)پاکستان پیپلز پارٹی (پی پی پی ) کے چیئرمین بلاول بھٹو زرداری نے ملائیشین وزیراعظم انور ابراہیم کے بیان کا خیرمقدم کرتے ہوئے کہا ہے کہ پاکستان کو دہشتگردی سے جوڑنے کی بھارتی کوشش ناکام ہو چکی ہے اور نیا دہلی عالمی سطح پر مکمل طور پر بے نقاب ہو گیا ہے۔
سابق وفاقی وزیرِ خارجہ بلاول بھٹو زرداری نے سماجی رابطے کی سائٹ ’ایکس‘ پر اپنے ایک بیان میں کہا کہ ملائیشین وزیراعظم انور ابراہیم نے بھارتی نشریاتی ادارے ’این ڈی ٹی وی‘ کو انٹرویو کے دوران بھارت کے من گھڑت پروپیگنڈے کو بے نقاب کیا ہے۔

انہوں نے کہا کہ حقیقت یہ ہے کہ بھارت نے ایک جھوٹ کی بنیاد پر جنگ شروع کی اور اس میں اسے بدترین ناکامی کا سامنا کرنا پڑا۔
پہلگام واقعے اور پاکستان پر الزامات کی حقیقت
نیا دہلی میں منعقدہ ’برکس‘ سربراہی اجلاس کے موقع پر بھارتی اینکر نے ملائیشین وزیراعظم سے اپریل 2025 کے پہلگام حملے کے حوالے سے سوال کرتے ہوئے پاکستان کو جوڑنے کی کوشش کی، جسے انور ابراہیم نے صاف انکار کرتے ہوئے مسترد کر دیا۔
ملائیشین وزیراعظم کا کہنا تھا کہ ملائیشیا کے سیکیورٹی اداروں نے انہیں ایسی کوئی اطلاع نہیں دی اور نہ ہی پاکستان کے ریاستی طور پر ملوث ہونے کے کوئی ثبوت فراہم کیے گئے ہیں۔
ان کے اس واضح بیان نے اسلام آباد پر بھارتی الزامات کو مکمل طور پر رد کر دیا۔ اس کے علاوہ ملائیشین وزیراعظم نے ایک سوال کے جواب میں غزة میں اسرائیل کے اقدامات کو کھلم کھلا ’ریاستی دہشتگردی‘ قرار دیا۔
سیز فائر کی پاسداری اور مذاکرات کا مطالبہ
بلاول بھٹو زرداری نے زور دے کر کہا کہ بھارت کو اب سیز فائر کے موقع پر کیے گئے اپنے تمام معاہدوں کی پاسداری کرنی چاہیے اور پاکستان کے ساتھ تمام تنازعات اور ’فرکشن پوائنٹس‘ پر باضابطہ مذاکرات کی میز پر آنا چاہیے، تاکہ خطے میں پائیدار امن، خوشحالی اور استحکام لایا جا سکے۔
یاد رہے کہ 22 اپریل 2025 کو بھارتی غیر قانونی مقبوضہ جموں کشمیر کے علاقے پہلگام میں ایک حملہ ہوا تھا جس میں 26 افراد مارے گئے تھے جن میں اکثریت سیاحوں کی تھی۔
مزید پڑھیں:سابق پاکستانی فوجی سربراہ جنرل اشفاق کیانی سے متعلق بھارتی پروپیگنڈا بے نقاب
بھارت نے بلا ثبوت اس کا الزام پاکستان پر عائد کیا جبکہ اسلام آباد نے اس کی سخت تردید کرتے ہوئے غیر جانبدارانہ تحقیقات کا مطالبہ کیا تھا۔
بعد ازاں 6 اور 7 مئی کو بھارت نے پاکستان پر فوجی حملے کیے، جس کے نتیجے میں دونوں ایٹمی پڑوسیوں کے درمیان شدید مسلح تصادم شروع ہو گیا۔
87 گھنٹے تک جاری رہنے والے اس معرکے میں پاک فوج نے شاندار دفاع کرتے ہوئے فرانس کے ساختہ ’رافیل‘ طیاروں سمیت 8 بھارتی جنگی طیارے اور درجنوں ڈرونز مار گرائے تھے۔
بعد میں امریکی ثالثی میں سیز فائر طے پایا تھا، جس کے بعد سے پاکستان مسلسل تنازعات کو بات چیت سے حل کرنے پر زور دے رہا ہے۔
واضح رہے کہ ملائیشین وزیراعظم کا ’این ڈی ٹی وی‘ پر دیا گیا بیان بھارت کی سفارتی تنہائی اور اس کے جعلی بیانیے کی قلعی کھولتا ہے۔
نیا دہلی میں ’برکس‘ جیسے اہم عالمی فورم کے موقع پر کسی تیسرے ملک کے سربراہِ مملکت کا بھارتی میڈیا کے الزامات کو تسلیم نہ کرنا بھارت کے لیے ایک بڑی سفارتی ہزیمیت ہے۔
بلاول بھٹو زرداری کی جانب سے اس موقع کا فوری سفارتی استعمال اور سیز فائر کے تحت بات چیت کی پیشکش پاکستان کی ذمہ دارانہ بین الاقوامی پالیسی کی عکاسی کرتی ہے۔ یہ واقعہ ثابت کرتا ہے کہ جارحانہ فوجی اقدامات اور جھوٹے بیانیے کے ذریعے عالمی برادری کو گمراہ کرنے کی بھارتی حکمتِ عملی اب مکمل طور پر ناکام ہو چکی ہے۔