جہانگیر ترین گروپ کے اجلاسوں میں اراکین کی تعداد کم ہونے لگی، اراکین مزید تقسیم ہوگئے

(قدرت روزنامہ)تحریک انصاف جہانگیر ترین گروپ کے اجلاسوں میں اراکین کی تعداد کم ہونے لگی .

ذرائع کے مطابق ترین گروپ کے حالیہ 5 اجلاسوں میں راجہ ریاض سمیت کوئی رکن قومی اسمبلی شریک نہیں ہوا جب کہ حالیہ اجلاسوں میں ترین گروپ کے 10 ارکان پنجاب اسمبلی بھی شریک نہیں ہوئے .

ذرائع کے مطابق اجلاسوں میں نہ آنے والےارکان میں ایم پی اے عمرآفتاب ،نذیربلوچ، امین چوہدری، افتخارگوندل، غلام الرسول سانگھا، قاسم لنگا اور آصف مجید شامل ہیں .

ترین گروپ کے 5 ایم پی ایز وزیراعلیٰ پنجاب سے ملاقات کرکے ان پر اعتماد کا اظہار کرچکے ہیں جن میں فیصل جبوانہ، اسلم بھروانہ، عمر آفتاب اور خرم لغاری شامل ہیں .

دوسری جانب اپوزیشن جماعت مسلم لیگ (ن) کے نائب صدر اور اپوزیشن لیڈر پنجاب اسمبلی حمزہ شہباز سے ملاقات میں ترین گروپ کے 7 ایم پی ایز شریک ہوئے .

خیال رہے کہ جہانگیر ترین اس وقت لندن میں موجود ہیں جہاں ان کا علاج جاری ہے، ڈاکٹرز نے انہیں سفر کرنے سے منع کیا اس لئے کشیدہ سیاسی صورتحال کے باوجود ملک نہیں لوٹ سکے .

ذرائع کا کہنا ہے کہ ترین گروپ میں اراکین کی تعداد کی کمی کی وجہ ان کا ملک میں نہ ہونا ہے .