”پاکستان، افغانستان میں عبادت گاہوں پر دہشت گردانہ حملوں کی شدید مذمت کرتا ہے”،ترجمان دفتر خارجہ

اسلام آباد (قدرت روزنامہ)ترجمان دفتر خارجہ عاصم افتخار احمد نے کہا ہے کہ پاکستان کو افغانستان میں عبادت گاہوں پر دہشت گردانہ حملوں کے حالیہ سلسلے پر شدید تشویش ہے .
تفصیلات کے مطابق پاکستان نے کابل میں گوردوارہ پر دہشت گردانہ حملے کی شدید مذمت کی، ترجمان دفتر خارجہ کا کہنا ہے کہ دہشت گردانہ حملے کے نتیجے میں قیمتی جانیں ضائع ہوئیں اور متعدد افراد زخمی ہوئے جبکہ املاک کو نقصان پہنچا .

انہوں نے کہا کہ پاکستان کو افغانستان میں عبادت گاہوں پر دہشت گردانہ حملوں کے حالیہ سلسلے پر شدید تشویش ہے، مذہبی مقامات کو نشانہ بنانے والی دہشت گردی کی یہ کارروائیاں سراسر نفرت انگیز ہیں .
ان کا کہنا تھا کہ پاکستان ہر قسم کی دہشت گردی کی مذمت کا اعادہ کرتا ہے، ہم افغانستان کے عوام کے ساتھ بھرپور یکجہتی کا اظہار کرتے ہیں، دہشت گردی سے لڑنے اور اپنے تمام شہریوں کے تحفظ کو یقینی بنانے کے لیے افغان حکام کی تمام کوششوں کی حمایت کرتے ہیں .