بولان میں خودکش دھماکا، بلوچستان کانسٹیبلری کے 9 اہلکار شہید، 9 زخمی

بولان (قدرت روزنامہ)بلوچستان کے ضلع بولان کے علاقے میں کنبڑی پل کے نزدیک بلوچستان کانسٹیبلری کے ٹرک کے قریب دھماکا ہوا ہے . بولان پولیس کے مطابق دھماکے کے نتیجے میں بلوچستان کانسٹیبلری کے 9 اہلکار شہید ہو گئے جبکہ 9 اہلکار زخمی ہوئے ہیں .

ایس ایس پی کچھی محمود نوتیزئی کا 9 اہلکاروں کی شہادت کی تصدیق کرتے ہوئے کہنا ہے کہ ابتدائی شواہد کے مطابق بولان دھماکا خود کش تھا . انہوں نے بتایا ہے کہ دھماکے کے بعد بم ڈسپوزل ٹیم جائے وقوع پر پہنچ گئی، علاقے کو سرچ کیا جا رہا ہے .
دھماکے سے بلوچستان کانسٹیبلری کا ٹرک الٹ گیا
بولان پولیس کا کہنا ہے کہ دھماکے کے نتیجے میں بلوچستان کانسٹیبلری کا ٹرک الٹ گیا تھا . بلوچستان کانسٹیبلری کے اہلکار سبی میلے میں ڈیوٹی انجام دینے کے بعد کوئٹہ واپس آ رہے تھے کہ بولان کے علاقے میں دھماکے کا شکار ہو گئے . دھماکے کے فوری بعد پولیس اور قانون نافذ کرنے والے اداروں کے اہلکار اور ریسکیو ٹیمیں دھماکے کی جگہ پہنچ گئیں .
پولیس اور قانون نافذ کرنے والے اداروں کے اہلکاروں نے علاقے کو گھیرے میں لے لیا ہے . بولان پولیس کا کہنا ہے کہ زخمیوں کو ڈویژنل ہیڈ کوارٹر اسپتال سبی منتقل کیا گیا ہے . پولیس کے مطابق بولان دھماکے کے 3 زخمیوں کی حالت تشویش ناک ہے جنہیں سی ایم ایچ سبی منتقل کیا گیا ہے .
زخمیوں کو لانے کیلئے ہیلی کاپٹر روانہ
بلوچستان حکومت نے فیصلہ کیا ہے کہ بولان بم دھماکے کے زخمیوں کو ہیلی کاپٹر کے ذریعے کوئٹہ منتقل کیا جائے گا . حکومتِ بلوچستان کے اعلامیے میں بتایا گیا ہے کہ حکومتِ بلوچستان کی جانب سے ہیلی کاپٹر کوئٹہ سے بولان کے لیے روانہ کر دیاگیا ہے .
وزیرِ اعلیٰ بلوچستان کی ہدایت پر کوئٹہ کے اسپتالوں میں ایمرجنسی نافذ کر کے ڈاکٹرز اور عملہ طلب کر لیا گیا ہے .
سول اسپتال کوئٹہ میں ایمرجنسی نافذ
بولان میں بم دھماکے کے پیشِ نظر سول اسپتال کوئٹہ میں ایمرجنسی نافذ کر دی گئی . ایم ایس سول اسپتال کوئٹہ کے مطابق تمام کنسلٹنٹس، ڈاکٹرز، فارماسسٹس، اسٹاف نرسز اور پیرا میڈیکل اسٹاف کو طلب کر لیا گیا ہے .
انہوں نے یہ بھی بتایا ہے کہ جنرل اور ایمرجنسی آپریشن تھیٹرز اور شعبۂ حادثات میں تمام ڈاکٹرز اور طبی عملہ موجود ہے .