ایوارڈز کی تقریب میں علی ظفر نے اپنی اہلیہ کا لباس زیب تن کرلیا
اسلام آباد (قدرت روزنامہ)پاکستان میوزک انڈسٹری کے ورسٹائل گلوکار، اداکار اور ماڈل علی ظفر نے خواتین کو خراج تحسین پیش کرنے کے لئے منعقدہ تقریب میں اپنی اہلیہ کا لباس زیب تن کرلیا۔مختلف سوشل میڈیا پر وائرل تصاویر اور ویڈیوز میں علی ظفر کو اپنی اہلیہ کی فرمائش پر ان کا لباس پہنے ہوئے دیکھا جاسکتا ہے۔
مائیکرو بلاگنگ سائٹ ٹوئٹر پر چند روز قبل مذکورہ تقریب سے ایک تصویر شیئر کرتے ہوئے علی ظفر نے بتایا کہ ’خواتین کے لئے منعقدہ یہ تقریب کل نشر ہونے والی ہے جس میں، میں پرفارم کرنے والا ہوں اور اُن خواتین کو خراج تحسین پیش کر رہا ہوں جنہوں نے اپنی پرواہ کئے بغیر اپنی زندگی اپنے اہل خانہ کے لئے وقف کردی، ان میں میری والدہ اور اہلیہ بھی شامل ہیں۔ میں نے اپنی اہلیہ سے اظہار محبت کرنے کے لئے ان کا لباس زیب تن کیا‘.
علی ظفر کے مطابق انہوں نے یہ لباس اپنی اہلیہ کی فرمائش پر ان خواتین کو خراج تحسین پیش کرنے کے لیے پہنا جنہوں نے کسی نہ کسی مشن پر کام کیا اور دوسرے لوگوں کی زندگیاں آسان بنائیں۔انہوں نے یہ بھی بتایا کہ یہ ایک جاپانی ڈیزائنر کا تیار کر دہ لباس ہے۔
واضح رہے کہ اس سے قبل بھی علی ظفر نے ناخنوں پر اپنے سیاہ رنگ کے لباس سے میچنگ کرتا ہوا نیل پینٹ لگا کر تصویر شیئر کی تھی اور کہا تھا کہ یہ آپ کا فیصلہ ہے کہ آپ کون ہیں ، کوئی اور یہ فیصلہ نہیں کرسکتا۔انہیں اپنی اس پوسٹ پر سوشل میڈیا صارفین کی جانب سے شدید تنقید کا سامنا کرنا پڑا تھا۔
