بشری بی بی نے توشہ خانہ اور نکاح کیسز کے فیصلے چیلنج کردیے

اسلام آباد(قدرت روزنامہ)بانی پی ٹی آئی عمران خان کی اہلیہ بشری بی بی نے توشہ خانہ اور نکاح کیسز کے فیصلے چیلنج کردیے۔بشری بی بی نے توشہ خانہ ریفرنس میں سزا کے خلاف اسلام آباد ہائیکورٹ میں اپیل دائر کردی جس میں ریاست اور نیب کو فریق بنایا گیا ہے۔
انہوں نے احتساب عدالت کا 31 جنوری کا آرڈر کالعدم قرار دینے کی استدعا کرتے ہوئے کہا کہ نیب نے تعصب پر مبنی تفتیش کی اور بدنیتی پر مبنی جعلی ریفرنس دائر کیا ، نیب نے سیاسی مخالفین کی ہدایت پر جھوٹا اور جعلی ریفرنس دائر کیا ، فرد جرم بھی درست انداز میں قانونی تقاضوں کے مطابق نہیں عائد کی گئی۔
واضح رہے کہ احتساب عدالت نے انہیں 14 سال قید بامشقت اور 787 ملین روپے جرمانے کی سزا سنائی ہے۔بشریٰ بی بی نے ڈسٹرکٹ اینڈ سیشن کورٹ اسلام آباد میں عدت میں نکاح کیس کا فیصلہ بھی چیلنج کردیا۔
انہوں نے سزا کیخلاف اسلام آباد کی سیشن کورٹ سے رجوع کرتے ہوئے استدعا کی کہ عدت میں نکاح کیس کا فیصلہ غیر قانونی، غیر اسلامی، غیر شرعی اور انصاف کے برخلاف ہے، عدت میں نکاح کیس میں سزا کے فیصلے کو کالعدم قرار دیا جائے، ٹرائل کورٹ کا تین فروری کا فیصلہ کالعدم قرار دیا جائے۔ واضح رہے کہ عدالت نے بشری بی بی کو سات سال قید کا حکم دیا ہے۔