کوئٹہ میں برفباری : کراچی میں سردی کیسی پڑے گی؟

کوئٹہ (قدرت روزنامہ) بلوچستان کے مختلف علاقوں زیارت، کان مہتر زئی، کوژک اور خانوزئی میں برف باری کے بعد سردی میں خاطر خواہ اضافہ ہوگیا ہے جس کے بعد غالب گمان ہے کہ کراچی میں بھی سردی اپنا زور دکھائے گی۔
تفصیلات کے مطابق ملک بھر میں شدید سردی کی لہر برقرار ہے، بالائی علاقوں میں بارش اور برفباری سے موسم سرد ہوگیا ہے، محکمہ موسمیات نے ملک میں سردی کی شدت مزید بڑھنے کی پیشگوئی کی ہے۔
زیارت، مسلم باغ اور مستونگ کے علاقے لک پاس میں ہلکی برفباری ہوئی ہے جس کے سبب اہم شاہراہوں پر برف جمنے سے راستے بند ہوگئے۔
نیشنل ہائی وے اتھارٹی کے ترجمان کا کہنا ہے کہ کوئٹہ کی اہم شاہراہیں کھولنے کے لئے آپریشن جاری ہے، پی ڈی ایم اے کے اہلکار شاہراہوں میں ٹریفک کی روانی بحال کرنے کے کام میں مصروف عمل ہیں۔

دوسری جانب محکمہ موسمیات کا کہنا ہے کہ بالائی علاقوں اور شمال مغربی بلوچستان میں بارش اور برفباری کا امکان ہے، آج سے مغربی ہواؤں کا سلسلہ مغربی علاقوں میں داخل ہوگا۔
محکمہ موسمیات کے مطابق بیس جنوری تک کوئٹہ، زیارت، چمن، بارکھان، قلات اور خضدار میں بارش کا امکان ہے، راولپنڈی، اسلام آباد، اٹک، جہلم اور چکوال میں بھی بادل برسیں گے۔