نئے آئی جی کے پی کا دہشتگردوں سے لڑنے والے پولیس جوانوں کیلیے انعام کا اعلان

پشاور(قدرت روزنامہ)نئے آئی جی خیبر پختونخوا ذوالفقار حمید نے پنجاب طرز کی پولسنگ کا آغاز کرتے ہوئے صوبے میں دہشتگردوں سے لڑنے والے پولیس جوانوں کے لیے انعام کا اعلان کر دیا۔
آئی جی ذوالفقار حمید نے کہا کہ بنوں پولیس آئے روز جرات و بہادری کی نئی داستانیں رقم کر رہی ہے۔
بنوں پولیس نے تھانہ منڈان کی حدود میں چوکی فتح خیل پر رات گئے ہونے والا دہشت گردوں کا حملہ ناکام بنایا، نصف شب 10/15 مسلح دہشت گردوں نے پولیس پوسٹ پر ہلکے اور بھاری ہتھیاروں سے حملہ کیا۔
شرپسندوں اور پولیس کے مابین آدھے گھنٹے تک شدید فائرنگ کا تبادلہ جاری رہا، پولیس کی بھر پور جوابی کارروائی سے دہشت گرد زخمی حالت میں فرار ہوگیا۔ علاقے میں سرچ آپریشن کے دوران مختلف جگہوں پر خون کے نشانات پائے گئے جبکہ موقع واردات پر دہشت گردوں سے پسماندہ ہینڈ گرنیڈ برآمد ہوا۔
آئی جی ذوالفقار حمید نے بنوں پولیس کو خراج تحسین پیش کرتے ہوئے حملہ پسپا کرنے والوں کے لیے نقد انعامات کا اعلان کیا۔ انہوں نے کہا کہ خیبر پختونخوا پولیس دہشت گردوں سے نمٹنے کی بھر پور صلاحیت رکھتی ہے۔
ڈی پی او بنوں ضیا ءالدین نے چوکی فتح خیل پہنچ کر جوانوں کو آئی جی پی خیبر پختونخوا کی طرف سے موقع پر نقد انعامات دیے۔