سابق کمشنر کوئٹہ افتخار جوگزئی کی بیٹی صائمہ کا فضائی سفر کے دوران ہنگامہ آرائی، فضائی میزبان پر تشدد

کوئٹہ (قدرت روزنامہ) سابق کمشنر کوئٹہ افتخار جوگزئی کی بیٹی صائمہ نے فضائی سفر کے دوران شدید ہنگامہ آرائی کی، جس کے نتیجے میں فضائی میزبان زخمی ہو گئیں۔ ذرائع کے مطابق، یہ واقعہ گزشتہ روز کوئٹہ سے اسلام آباد جانے والی سرین ایئر کی فلائٹ نمبر 540 میں پیش آیا۔ صائمہ جوگزئی نے اپنے والد کے ہمراہ سفر کرتے ہوئے خاتون فضائی میزبان کے ساتھ تلخ کلامی کی اور غصے میں آ کر اس کی ناک پر مکہ مارا، جس سے فضائی میزبان زخمی ہو گئیں۔
ذرائع کا کہنا ہے کہ صائمہ اور ان کے والد افتخار جوگزئی نے کوئٹہ ایئرپورٹ پر چیک ان کے دوران بھی عملے کے ساتھ بدتمیزی کی۔ طیارے میں داخل ہونے کے بعد جب خاتون فضائی میزبان نے صائمہ جوگزئی کو سیٹ بیلٹ باندھنے اور کھانے کی میز بند کرنے کی ہدایت کی تو صائمہ جوگزئی غصے میں آ گئیں، غیر شائستہ زبان استعمال کی اور شور شرابہ کیا۔
فضائی میزبان نے اس بدتمیزی کے بارے میں کپتان کو آگاہ کیا، جس پر کپتان نے کنٹرول ٹاور سے رابطہ کر کے طیارہ رن وے سے واپس لے لیا اور ایئرپورٹ سیکیورٹی فورس (اے ایس ایف) کو فوری طور پر طلب کیا۔ کپتان نے باپ اور بیٹی کو آف لوڈ کرنے کا حکم دیا، لیکن صائمہ جوگزئی نے طیارے سے اترنے سے انکار کر دیا۔
غصے میں آ کر صائمہ جوگزئی نے فضائی میزبان کو مکہ مارا، جس کے نتیجے میں فضائی میزبان کی ناک سے خون بہنے لگا اور ایک دانت بھی ٹوٹ گیا۔ فضائی میزبان کے زخمی ہونے کے بعد اے ایس ایف نے دونوں باپ بیٹی کو حراست میں لے لیا۔
بلوچستان کی انتظامیہ نے ایئرلائن انتظامیہ پر دباؤ ڈالا کہ وہ اس معاملے کو رفع دفع کریں۔ ایئر لائن انتظامیہ نے بتایا کہ کمشنر کوئٹہ فوراً کوئٹہ ایئرپورٹ پہنچے اور اے ایس ایف سے صورتحال کا جائزہ لیا۔ کمشنر نے باپ اور بیٹی سے تحریری معافی نامہ لکھوایا، جس کے بعد دونوں کو جانے کی اجازت دے دی گئی۔ زخمی فضائی میزبان کو فوری طور پر ہسپتال منتقل کیا گیا۔
نجی ایئرلائن سرین ایئر کی انتظامیہ نے اس واقعہ کی تصدیق کی ہے