عوام کو پیٹرول کے لئے قطاروں میں کھڑا کر دینا صرف بے حسی اور نااہلی نہیں،ظلم کی انتہا ہے، مریم نواز کی وزیراعظم اور وفاقی وزراء کیلئے حیرت انگیز دعا

لاہور(قدرت روزنامہ)مسلم لیگ (ن) کی نائب صدر مریم نواز نے کہا ہے کہ عوام کو پیٹرول کے لئے قطاروں میں کھڑا کر دینا صرف بے حسی اور نااہلی نہیں،ظلم کی انتہا ہے . سماجی رابطے کی ویب سائٹ ٹویٹر پر اپنی ٹویٹ میں مسلم لیگ (ن) کی نائب صدر مریم نواز نے کہا کہ پاکستان کے عوام کو پہلے آٹا چینی اور اب پٹرول کیلئے قطاروں میں کھڑا کر دینا صرف بے حسی اور نااہلی نہیں بلکہ ظلم کی انتہا ہے، عوام تڑپتے اور رل رہے ہیں تاہم ظالم حکومت کو کوئی فرق نہیں پڑا، اور ایک دن بھی عوام پر قیامت ڈھانے والے عمران خان کو عوام کی تکالیف پر پریشان ہوتے ہوئے نہیں دیکھا .

مریم نواز نے مختلف پیٹرول پمس پر عوام کے رش کی تصاویر پوسٹ کرتے ہوئے کہا کہ یہ تصاویر صرف پیٹرول کے لیے قطاروں کی نہیں بلکہ عوام کے کرب، تکلیف اور بے بے بسی کی داستان ہے، دعا ہے ان قطاروں میں عمران خان، ان کو مسلط کرنے والے اور ان کے وفاقی وزرا بھی کھڑے ہوں تاکہ انہیں پتہ چلے کہ عوام پر کیا قیامت ٹوٹی ہے، یہ ہے وہ ذلت جو چند روز کے اقتدار کے لیے عمران خان نے کمائی ہے . عبرت کا نشان عمران خان . . .