اداکارہ سیلینا جیٹلی کا شوہر کے خلاف مقدمہ، ممبئی پولیس کی کارروائی تیز

ممبئی(قدرت روزنامہ)بالی ووڈ کی مشہور اداکارہ سیلینا جیٹلی کی شکایت پر ان کے آسٹریئن شوہر پیٹ ہیگ کے خلاف ممبئی پولیس نے تشدد، ہراسانی اور دھمکیوں کے الزامات پر مقدمہ درج کر لیا ہے۔
پولیس کے مطابق مقدمہ مختلف دفعات کے تحت درج کیا گیا ہے، جن میں جسمانی نقصان، ذہنی اذیت اور مسلسل ہراسانی سے متعلق الزامات شامل ہیں۔ کیس کا تعلق Protection of Women from Domestic Violence Act, 2005 کے تحت جاری کارروائی سے بھی ہے۔
حکام نے بتایا کہ تفتیش میں عدم تعاون کے باعث پیٹر ہیگ کے خلاف لوک آؤٹ سرکولر جاری کر دیا گیا ہے، جو عام طور پر اس وقت جاری کیا جاتا ہے جب کسی ملزم کے ملک سے فرار ہونے کا خدشہ ہو۔
پولیس کا کہنا ہے کہ تحقیقات جاری ہیں اور مزید پیش رفت شواہد کی بنیاد پر کی جائے گی، جبکہ اب تک ملزم یا ان کے وکلا کی جانب سے کوئی بیان سامنے نہیں آیا۔