50 لیٹر کے کار ٹینک میں 61 لیٹر پٹرول!

اسلام آباد(قدرت روزنامہ)ملک بھر میں پیٹرولیم مصنوعات کی بڑھتی قیمتوں کے باعث شہری پہلے ہی مہنگائی کے بوجھ تلے دبے ہوئے ہیں، ایسے میں بعض پٹرول پمپس پر مبینہ طور پر کم ناپ اور فراڈ کے ذریعے صارفین کو لوٹنے کے واقعات بھی سامنے آنے لگے ہیں۔ وفاقی دارالحکومت میں ایک شہری کی شکایت پر انتظامیہ نے کارروائی کرتے ہوئے مبینہ بے ضابطگی ثابت ہونے پر پٹرول پمپ کو سیل اور منیجر کو گرفتار کر لیا۔
ضلعی انتظامیہ کے مطابق سیکٹر آئی-9 میں واقع ایک پٹرول پمپ کے خلاف شہری نے شکایت درج کرائی کہ اس کی گاڑی کے 50 لیٹر گنجائش والے فیول ٹینک میں مبینہ طور پر 61 لیٹر پٹرول بھر دیا گیا، جس پر اسے فراڈ کا شبہ ہوا۔

سیکٹر آئی نائن میں واقع پیٹرول پمپ پر شہری کی 50 لیٹر کار ٹینک میں مبینہ طور پر 61 لیٹر پیٹرول ڈالنے کی اے سی انڈسٹریل ایریا کو شکایت پر مجسٹریٹ موقع پر پہنچے، شکایت کی تصدیق ہونے پر پیٹرول پمپ سیل، مینجر گرفتار جبکہ جرمانہ بھی عائد کیا گیا، ڈی سی اسلام آباد کی شہری شکایات پر فی… pic.twitter.com/uu8MrW0JAT

— DC Islamabad (@dcislamabad) July 24, 2026

شکایت موصول ہونے پر اسسٹنٹ کمشنر انڈسٹریل ایریا بطور مجسٹریٹ فوری موقع پر پہنچے اور پیمائش سمیت دیگر امور کی جانچ کی۔
ابتدائی تحقیقات میں شکایت درست پائے جانے پر پٹرول پمپ کو موقع پر ہی سیل کر دیا گیا، جبکہ پمپ کے منیجر کو گرفتار کرکے اس کے خلاف قانونی کارروائی شروع کر دی گئی۔ اس کے علاوہ انتظامیہ نے پٹرول پمپ پر جرمانہ بھی عائد کیا۔ ڈپٹی کمشنر اسلام آباد عرفان نواز میمن نے شہریوں کی شکایات پر فوری کارروائی کی ہدایت دیتے ہوئے کہا کہ ناپ تول میں خردبرد، جعلسازی یا صارفین کے استحصال میں ملوث عناصر کے خلاف بلاامتیاز کارروائی جاری رہے گی تاکہ شہریوں کے حقوق کا تحفظ یقینی بنایا جا سکے