آزاد کشمیر الیکشن کا دوسرا مرحلہ، مظفر آباد ڈویژن کی 9 اور مہاجرین کی 12 نشستوں کیلئے پولنگ

آزاد کشمیر(قدرت روزنامہ)آزاد کشمیر انتخابات کے دوسرے مرحلے کیلئے پولنگ کا عمل جاری ہے۔
آزاد کشمیر انتخابات کے دوسرے مرحلے میں مظفر آباد ڈویژن کی 9 اور مہاجرین کی 12 نشستوں کے لیے پولنگ کا عمل صبح 8 بجے شروع ہوا جو شام 5 بجے تک جاری رہے گا۔
مظفرآباد ڈویژن میں ایک ہزار 4 سو 83 پولنگ اسٹیشن قائم کیے گئے ہیں جبکہ جموں اور ویلی کی 6، 6 نشستوں پر ملک کے مختلف شہروں میں مقیم کشمیری ووٹرز اپنا حق رائے دہی استعمال کریں گے۔
ادھر جموں 1 اور کشمیر ویلی 1 کی نشست پرکراچی میں پولنگ شروع ہوگئی ہے، دونوں نشستوں کے لیے 34 پولنگ اسٹیشنز قائم کیے گئے ہیں، کراچی میں جموں 1 کی نشست پر 698 رجسٹرڈ ووٹرز ہیں جبکہ کراچی میں کشمیر ویلی 1 کی نشست پر 4 ہزار 200 رجسٹرڈ ووٹرز ہیں۔
مزید براں راولپنڈی،اسلام آباد میں بھی مہاجرین کی 3 نشستوں پر پولنگ آج ہو رہی ہے، مہاجرین کی 3 نشستوں میں ایل اے43 ویلی 4 اور ایل اے 44 ویلی 5 شامل ہیں۔
ایل اے 39 جموں 6 پر بھی راولپنڈی، اسلام آباد میں پولنگ ہو رہی ہے، ایل اے43 ویلی 4 میں کل 12 امیدوار مد مقابل ہیں جبکہ ایل اے 44 ویلی 5 میں کل 8 امیدوار مدمقابل ہیں اور ایل اے39 جموں 6 کی نشست پر کل 14 امیدوار میدان میں ہیں۔
کون کون امیدوار مدمقابل ہیں؟
ویلی4 سے پیپلزپارٹی کے جاوید بٹ، ن لیگ کے محمد یاسین اور آئی پی پی کے حمزہ مجید مدمقابل ہیں، ویلی5 میں ن لیگ کے احمد رضاقادری، پیپلزپارٹی کے محمد راشد اسلام مدمقابل ہیں اور ویلی5 میں ہی جماعت اسلامی کے حنیف منظور ڈار اور مسلم کانفرنس کی مہرالنسا مدمقابل ہیں۔
جموں 6 میں پیپلزپارٹی کے چوہدری فخرزمان، ن لیگ کے راجہ محمد صدیق، آئی پی پی کے محمد طاہر کھوکھر بھی مدمقابل ہیں۔
اس کے علاوہ ایل اے43 ویلی 4 میں 16سو سے زائد خواتین ووٹرزسمیت رجسٹرڈووٹرز کی تعداد 3ہزار 346 ہے، ایل اے44 ویلی 5 میں 3 ہزار 294 خواتین ووٹرز سمیت رجسٹرڈ ووٹرز کی تعداد 6 ہزار 996 ہے۔
ایل اے 39 جموں 6 میں رجسٹرڈ ووٹرز کی تعداد 37 ہزار کے قریب ہے، ایل اے 39جموں 6 میں چکوال،جہلم، اٹک، پشاور، تلہ گنگ بھی شامل ہیں۔
ڈسٹرکٹ الیکشن کمیشن نے ایل اے43 ویلی 4 میں 10 پولنگ اسٹیشن قائم کیے ہیں، ایل اے 44 ویلی 5 میں 27 پولنگ اسٹیشن قائم کیے گئے ہیں، ایل اے 39 جموں 6 میں 155 پولنگ اسٹیشن قائم کیے گئے ہیں۔
خیال رہے کہ مظفرآباد ڈویژن کے 3 اضلاع میں رجسٹرڈ ووٹرز کی تعداد 8 لاکھ 90 ہزار 621 ہے، جن میں مرد ووٹرز کی تعداد 4 لاکھ 27 ہزار 955 اور خواتین ووٹرز کی تعداد3 لاکھ 81 ہزار 6 سو 66 ہے۔