متحدہ عرب امارات نے پاکستانیوں کو ویزے جاری کرنا شروع کردیے

اسلام آباد(قدرت روزنامہ) کئی ماہ کی غیر یقینی صورتحال کے بعد یو اے ای وزٹ ویزہ حاصل کرنے کے خواہشمند پاکستانی شہریوں کے لیے اچھی خبر سامنے آئی ہے۔ متحدہ عرب امارات (یو اے ای) نے پاکستانیوں کے لیے وزٹ ویزوں کے اجرا کا عمل دوبارہ شروع کر دیا ہے، جس سے سیاحت، خاندانی ملاقاتوں اور کاروباری سفر میں آسانی کی توقع کی جا رہی ہے۔
سفری صنعت سے وابستہ نمائندوں اور یو اے ای سفارت خانے کے حکام کے مطابق، رجسٹرڈ ٹریول ایجنٹس کے ذریعے درخواست جمع کرانے والے پاکستانی شہریوں کو دوبارہ وزٹ ویزے جاری کیے جا رہے ہیں۔ مکمل دستاویزات رکھنے والے درخواست گزاروں کی درخواستوں پر پہلے کے مقابلے میں تیزی سے کارروائی کی جا رہی ہے۔
عرب نیوز کے مطابق متحدہ عرب امارات میں تقریباً 18 لاکھ پاکستانی مقیم ہیں، جبکہ یہ ملک پاکستان کے لیے ترسیلاتِ زر کا بھی ایک بڑا ذریعہ ہے۔ گزشتہ کئی ماہ کے دوران ویزا درخواستوں کی منظوری میں تاخیر اور سخت جانچ پڑتال کے باعث متعدد درخواست گزاروں کو مشکلات کا سامنا کرنا پڑا تھا، اگرچہ دونوں ممالک کی حکومتوں نے بارہا واضح کیا تھا کہ پاکستانی شہریوں پر کوئی باضابطہ ویزا پابندی عائد نہیں۔
ٹریول ایجنٹس ایسوسی ایشن آف پاکستان (TAAP) کے سابق چیئرمین اور اروما ٹریولز کے چیف ایگزیکٹو محمد ندیم شریف کے مطابق، خاندان کے ساتھ سفر کرنے والے افراد اور متحدہ عرب امارات میں مقیم اپنے عزیزوں سے ملنے جانے والے پاکستانیوں کو یو اے ای وزٹ ویزہ نسبتاً آسانی سے جاری کیا جا رہا ہے۔
انہوں نے بتایا کہ حالیہ علاقائی کشیدگی کے باعث متاثر ہونے والی فضائی سرگرمیاں بھی آہستہ آہستہ معمول پر آ رہی ہیں، جس سے سیاحت کے شعبے میں بہتری کی امید پیدا ہوئی ہے۔
پاکستانی امیگریشن کے ایک سینئر اہلکار کے مطابق، پاکستان سے دبئی جانے والے مسافروں کی یومیہ تعداد بھی نمایاں طور پر بڑھی ہے۔ موسم گرما کے آغاز میں یہ تعداد تقریباً 170 مسافر روزانہ تھی، جو جولائی کے آخری ہفتے تک بڑھ کر 400 مسافر روزانہ تک پہنچ گئی۔ تاہم یہ تعداد اب بھی دو سال قبل کے مقابلے میں کم ہے، جب روزانہ تقریباً ایک ہزار پاکستانی دبئی کا سفر کرتے تھے۔
یو اے ای سفارت خانے کے ایک اہلکار نے بھی تصدیق کی کہ رجسٹرڈ ٹریول ایجنٹس کے ذریعے عام پاسپورٹ رکھنے والے پاکستانی شہریوں کو وزٹ ویزے جاری کیے جا رہے ہیں۔ ان کے مطابق ماضی میں سیکیورٹی وجوہات کی بنیاد پر جانچ کا عمل سخت کیا گیا تھا، تاہم اب مکمل اور درست دستاویزات رکھنے والے درخواست گزار نسبتاً آسانی سے درخواست جمع کرا سکتے ہیں۔
یاد رہے کہ گزشتہ برس پاکستان اور متحدہ عرب امارات نے ویزا سہولت کو بہتر بنانے پر اتفاق کیا تھا۔ وزارت خارجہ کے مطابق ماضی میں بعض درخواست گزاروں کی جانب سے جعلی تعلیمی اسناد، جعلی ملازمت کے معاہدے اور دیگر بے ضابطگیوں کے باعث اضافی جانچ پڑتال کا عمل متعارف کرایا گیا تھا۔