جماعت اسلامی کی جدوجہد کے نتیجے میں حکومت 100 روپے فی لیٹر ریلیف دینے پر مجبور ہوئی، حافظ نعیم الرحمان

اسلام آباد(قدرت روزنامہ)امیر جماعت اسلامی حافظ نعیم الرحمان نے کہا ہے کہ جماعت اسلامی کی جدوجہد کے نتیجے میں حکومت 100 روپے فی لیٹر ریلیف دینے پر مجبور ہوئی۔

انہوں نے وزیراعظم کی جانب سے پیٹرول کی قیمتوں میں اضافے کے بوجھ کو کم کرنے کے لیے اعلان کردہ خصوصی ریلیف اسکیم پر ردعمل دیتے ہوئے کہا ہے کہ ظالمانہ پیٹرولیم لیوی کے خلاف جماعت اسلامی کی جدوجہد کے نتیجے میں حکومت 100 روپے فی لیٹر ریلیف دینے پر مجبور ہوئی۔

حافظ نعیم الرحمان کا کہنا ہے کہ موٹرسائیکل، رکشہ اور چھوٹی گاڑیوں کے لیے پیٹرول پر 100 روپے فی لیٹر ریلیف کی وزیراعظم کی اسکیم کا جائزہ لیں گے اور اس حوالے سے آج رات اپنا موقف دیں گے۔

امیر جماعت اسلامی نے کہا کہ وزیراعظم کی جانب سے اعلان کردہ اسکیم سے پیٹرولیم لیوی کے خلاف جاری جماعت اسلامی کی جدوجہد پر کوئی فرق نہیں پڑے گا، پیٹرولیم لیوی کے خلاف ہماری جدوجہد، لانگ مارچ اور دھرنے اس کے مکمل خاتمے تک جاری رہیں گے۔

حافظ نعیم الرحمان نے کہا کہ عوام پر پیٹرولیم مصنوعات کی قیمتوں میں اضافے کا بوجھ ڈالنے کے بجائے حکومت کو پیٹرولیم لیوی ختم کرنی چاہیے، انہوں نے واضح کیا کہ جماعت اسلامی ریلیف اسکیم کا جائزہ لینے کے بعد تفصیلی موقف سامنے لائے گی۔

یاد رہے کہ جماعت اسلامی کی جانب سے ملک کے مختلف شہروں میں پیٹرولیم مصنوعات کی قیمتوں میں کمی کے لیے دھرنے جاری ہیں اور جماعت اسلامی نے اس سلسلے میں 20 ستمبر کو اسلام آباد مارچ کا اعلان کر رکھا ہے۔

وزیراعظم کی خصوصی ریلیف اسکیم

اس سے قبل وزیراعظم شہباز شریف نے مشرق وسطیٰ میں حالیہ کشیدگی کے باعث عالمی منڈی میں تیل کی قیمتوں میں اضافے اور اس کے نتیجے میں عوام پر پڑنے والے اضافی بوجھ کا فوری نوٹس لیتے ہوئے خصوصی پیٹرول ریلیف اسکیم کا اعلان کیا۔

وزیراعظم کے مطابق موٹرسائیکل، رکشہ، چنگچی اور 800 سی سی تک کی چھوٹی گاڑیاں استعمال کرنے والوں کو پیٹرول پر فی لیٹر 100 روپے کا ریلیف دیا جائے گا۔

خصوصی اسکیم کے تحت موٹرسائیکل، رکشہ اور چنگچی سمیت دو اور تین پہیوں والی سواریوں کے لیے ماہانہ 20 لیٹر پیٹرول پر فی لیٹر 100 روپے کا ریلیف فراہم کیا جائے گا جبکہ 800 سی سی تک کی چھوٹی گاڑیوں کے مالکان کو ماہانہ 30 لیٹر پیٹرول پر فی لیٹر 100 روپے کا ریلیف ملے گا۔

اس طرح دو اور تین پہیوں والی سواریوں کے صارفین کو ماہانہ زیادہ سے زیادہ 2 ہزار روپے جبکہ 800 سی سی تک کی گاڑیوں کے مالکان کو ماہانہ 3 ہزار روپے تک ریلیف حاصل ہوگا۔

وزیراعظم نے کہا کہ تیل کی قیمتوں میں اضافے سے عوام پر پڑنے والے بوجھ کا حکومت کو مکمل احساس ہے، مشکل کی اس گھڑی میں عوام کو تنہا نہیں چھوڑیں گے۔

وزیراعظم کے مطابق اسلام آباد کی حدود میں اسکیم کا اطلاق پیر اور منگل کی درمیانی شب سے کیا جائے گا جبکہ پورے پاکستان، بشمول آزاد کشمیر اور گلگت بلتستان، میں اس کا اطلاق بدھ اور جمعرات کی درمیانی شب سے ہوگا۔

خصوصی ریلیف اسکیم کے لیے رجسٹریشن کا آغاز بھی آج سے کردیا گیا ہے، جبکہ اسکیم کے طریقہ کار سے متعلق آگاہی مہم کے ذریعے عوام کو تفصیلات فراہم کی جائیں گی۔