سرکاری جہاز کے ذاتی استعمال پر مریم نواز کو 2 کروڑ 93 لاکھ سے زائد کا چالان جاری ہونے کا دعویٰ

لاہور (قدرت روزنامہ)وزیراعلیٰ پنجاب مریم نواز شریف کی جانب سے سرکاری طیارے کے مبینہ ذاتی استعمال اور اس پر اٹھنے والے کروڑوں روپے کے اخراجات سے متعلق نیا دعویٰ سامنے آگیا۔ صحافی اور تجزیہ کار سید عمران شفقت کے مطابق حکومتِ پنجاب نے وزیراعلیٰ کے ذاتی سفر پر ہونے والے اخراجات کا باقاعدہ حساب کتاب کرتے ہوئے چالان تیار کرکے ان کے حوالے کر دیا ہے، پنجاب حکومت کی جانب سے تیار کردہ اس چالان کا نمبر 32-A ہے۔
ان کا کہنا ہے کہ سرکاری طیارے پر وزیراعلیٰ پنجاب کے دورہ برطانیہ کے نجی سفر کے اخراجات کی مد میں مریم نواز کو جو کل رقم ادا کرنے کی ہدایت کی گئی ہے، وہ 2 کروڑ 93 لاکھ 65 ہزار 976 روپے بنتی ہے۔

مریم نواز صاحبہ نے جو سرکاری جہاز کا ذاتی استعمال کیا تھا اس پر اٹھنے والے اخراجات کا تخمینہ لگا کر حکومت پنجاب نے چالان تیار کرکے ان کے حوالے کردیا ہے ، چالان کا نمبر 32 -A ہے اور جو ارقم @MaryamNSharif کو ادا کرنی ہے وہ دو کروڑ ترانوے لاکھ پینسٹھ ہزار نو سو چھہتر روپے ہے

— Syed Imran Shafqat (@SImranshafqat) September 14, 2026

دوسری جانب مسلم لیگ ن یا حکومتِ پنجاب کے ترجمان کی جانب سے اس مخصوص چالان نمبر 32-A اور 2 کروڑ 93 لاکھ سے زائد کی رقم کے دعوے پر تاحال کوئی باضابطہ تصدیق یا تردید جاری نہیں کی گئی، تاہم اسی حوالے سے صحافی اور تجزیہ کار رضوان رضی نے انتہائی ذمہ دار ذرائع کے حوالے سے دعویٰ کیا ہے کہ مریم نوازشریف نے اپنے دورہٴ برطانیہ کے دوران طیارے کے جملہ اخراجات کی تفصیلات منظرِ عام پر لانے کا حتمی فیصلہ کر لیا ہے۔

انتہائی ذمہ دار ذرائع کے مطابق، مریم نوازشریف نے اپنے طیارے کے خرچ، اس کے لینڈنگ و پارکنگ چارجز وغیرہ کے کل اڑھائی کروڑ روپے کے خرچ کی ادائیگی کو پبلک کرنے کا فیصلہ کیا ہے، ہو سکتا ہے کہ منگل یہ دستاویز مل جائیں۔

— Rizwan Razi™ (@realrazidada) September 11, 2026

انہوں نے بتایا کہ طیارے کے کل اڑھائی کروڑ روپے کے ان اخراجات میں اس کی پرواز، لینڈنگ اور پارکنگ چارجز سمیت دیگر تمام واجبات شامل ہیں، امکان ظاہر کیا جا رہا ہے کہ منگل کے روز تک یہ تمام مصدقہ دستاویزات عوام اور میڈیا کے سامنے پیش کر دی جائیں گی تاکہ اس معاملے پر جاری چہ مہ گوئیاں ختم ہو سکیں۔