ہم دہشتگردی کیخلاف لڑنے والا فرنٹ لائن صوبہ ہیں، ہماری وجہ سے باقی صوبوں میں امن ہے، سہیل آفریدی

پشاور (قدرت روزنامہ) وزیراعلیٰ خیبرپختونخوا محمد سہیل خان آفریدی کا کہنا ہے کہ ہم دہشتگردی کیخلاف لڑنے والا فرنٹ لائن صوبہ ہیں، ہماری وجہ سے باقی صوبوں میں امن ہے، بڑے صوبے کی جعلی وزیراعلیٰ کا یہ بیان کہ مجھے انڈیا سے نہیں بلکہ اپنے صوبوں سے خطرہ ہے، ان کا ایک ایک حرف ہمارے زخموں کو تازہ کرتا ہے۔
انہوں نے کوہاٹ اولڈ پولیس لائنز میں دھماکے، دہشت گرد حملے پر اہم ویڈیو پیغام میں کہا کہ آج کوہاٹ میں جو دہشت گردوں کا حملہ ہوا، خودکش حملہ ہوا، جس میں ہمارے پولیس جوان شہید ہوئے ہیں، عام عوام شہید ہوئے ہیں، تو اس دہشت گردی کے حملے کی صوبائی حکومت شدید الفاظ میں مذمت کرتی ہے اور اپنے شہداء کے درجات کی بلندی کی دعا کرتی ہے۔
ہم پورے پاکستان کو، اور خاص کر وہ لوگ جو خیبرپختونخوا کی عوام کو دہشت گرد بولتے ہیں، ان کو آج ایک دفعہ پھر پیغام دیتے ہیں کہ خیبرپختونخوا کی عوام نے پاکستان کے لیے 80 ہزار جانوں سے زیادہ نذرانہ پیش کیا ہے، تبھی پاکستان میں امن آیا تھا۔
ہم دہشت گردی کے خلاف لڑنے والا فرنٹ لائن صوبہ ہیں۔ ہماری عوام مسلسل قربانی دے رہی ہے۔ تو اس قربانی کی قدر کی جائے۔ یہاں پر ہمارے لوگ قربانی دے رہے ہیں، تو اس وجہ سے باقی صوبوں میں اور اسلام آباد میں امن ہے۔ ہم فرنٹ لائن پر لڑ رہے ہیں دہشت گردی کے خلاف، تو اسی لیے باقی پاکستان میں امن ہے۔ تو اسی لیے اس قربانی کی قدر کرنی چاہیے۔ ان کا ایک ایک حرف ہمارے زخموں کو تازہ کرتا ہے، ہماری شہداء کی بے حرمتی کرتا ہے۔
ہماری قربانی کو براہِ راست سمجھنا، میرا خیال ہے، بیوقوفوں والا کام ہوتا ہے۔ جس طرح ایک سب سے بڑے صوبے کے جعلی وزیراعلیٰ کی یہ اسٹیٹمنٹ آتی ہے کہ مجھے انڈیا سے کوئی خطرہ نہیں ہے، باقی تین صوبوں سے خطرہ ہے۔ تو یہ صوبے محب وطن پاکستانی ہیں۔ انہوں نے پاکستان کے لیے قربانی دی تھی، دے رہے ہیں اور ان شاء اللہ تعالیٰ ہمیشہ دیں گے، کیونکہ یہ ہمارا پاکستان ہے۔ ہم کسی بھی سازش اور کسی بندے کی طرف سے بھی اس سازش کو ہمیشہ ناکام بنائیں گے، جو ہمارے عوام کے درمیان تفریق پیدا کرے گا، تعصب پیدا کرے گا، نفرتیں پیدا کرے گا۔ ان شاء اللہ تعالیٰ ہمیشہ پاکستان زندہ باد رہے گا، قائم و دائم رہے گا، اور ہماری یہ قربانیاں پاکستان کے لیے ہمیشہ رہیں گی۔