مریم نواز پتھر کے دور میں واپس لے جانا چاہتی ہے جہاں گولی کے بدلی گولی ہو، لطیف کھوسہ
چوری کے بدلے چوری، یہ متشددانہ سوچ رکھتی ہے، مریم بی بی نے جو بات کی ہے وہ لاقانونیت کو جنم دینے کے مترادف ہے، ان کا ذہنی توازن مجھے نہیں لگتا ٹھیک ہے، پی ٹی آئی رہنما کی گفتگو
لاہور(قدرت روزنامہ)پاکستان تحریک انصاف (پی ٹی آئی) کے رہنما اور سینئر قانون دان سردار لطیف کھوسہ نے وزیراعلیٰ پنجاب مریم نواز کے بیان پر تنقید کرتے ہوئے کہا ہے کہ ان کا طرزِ بیان معاشرے میں لاقانونیت اور انتہا پسندی کو فروغ دینے کا باعث بن سکتا ہے۔ مریم نواز کو اپنے مؤقف پر نظرثانی کرنی چاہیے، کیونکہ کسی بھی شخص کو قانون اپنے ہاتھ میں لینے کا اختیار نہیں دیا جا سکتا۔
صحافی شاکر محمود اعوان کے ساتھ گفتگو کرتے ہوئے سردار لطیف کھوسہ نے کہا کہ مریم بی بی نے جو بات کی ہے وہ لاقانونیت کو جنم دینے کے مترادف ہے اور اس سے انتہا پسندی کو مزید ہوا ملتی ہے۔ سوال یہ ہے کہ آج کل کوئی عدالت اس معاملے پر ازخود نوٹس کیوں نہیں لے رہی؟ ان کے بقول مریم نواز کو اس بیان پر کٹہرے میں کھڑا ہونا چاہیے۔
مریم پھتر کے دور میں واپس لے جانا چاہتی ہے جہاں گولی کے بدلی گولی، چوری کے بدلے چوری، یہ متشددانہ سوچ رکھتی ہے، اس کا زہنی توازن مجھے نہیں لگتا ٹھیک ہے، لطیف کھوسہ
https://t.co/hX1ANjqFlt https://t.co/A4SzOG3u5U— Shakir Mehmood Awan (@ShakirAwan88) October 30, 2026
لطیف کھوسہ نے تنقید کرتے ہوئے کہا کہ مریم نواز خود ہی جلاد، جج اور قانون نافذ کرنے کا اختیار رکھنے والی بن گئی ہیں، حالانکہ کسی بھی معاشرے میں قانون کے نفاذ اور سزا دینے کا اختیار متعلقہ قانونی اداروں کے پاس ہوتا ہے، کسی انفرادی شخصیت کے پاس نہیں۔
انہوں نے کہا کہ اگر ہر شخص قانون اپنے ہاتھ میں لینا شروع کر دے اور کسی ایک شخص کے جرم کی سزا اس کے پورے خاندان یا قبیلے کو دینے لگے تو معاشرہ انصاف کے بجائے انتقام کی راہ پر چل پڑے گا۔ کسی شخص کے قتل کے جواب میں اس کے پورے قبیلے کو نشانہ بنانا اجتماعی سزا اور لاقانونیت کی بدترین مثال ہے۔ سردار لطیف کھوسہ نے قبائلی نظام کی مثال دیتے ہوئے کہا کہ ماضی میں کوسا اور لغاری قبائل کے درمیان بھی ایسے واقعات پیش آتے رہے ہیں۔
اگر ایک قبیلے کا کوئی شخص قتل ہو جاتا تو دوسرا قبیلہ انتقاماً اپنے کسی دوسرے فرد کو قتل کر دیتا، خواہ وہ بے گناہ ہی کیوں نہ ہو۔ اسی طرح ایک قبیلے کی جانب سے بھینس چوری کیے جانے پر دوسرا قبیلہ بدلے میں اس کی بکریاں اور گائیں چوری کر لیتا تھا۔ پی ٹی آئی رہنما کا کہنا تھا کہ مریم نواز کے بیانات معاشرے کو دوبارہ اسی قبائلی اور انتقامی دور کی طرف دھکیل سکتے ہیں، جہاں لوگ قانون اور عدالتوں کے بجائے خود فیصلے کرتے تھے۔
انہوں نے زور دیا کہ ریاست میں قانون کی بالادستی قائم رہنی چاہیے اور کسی کو بھی ذاتی یا اجتماعی انتقام کی بنیاد پر کارروائی کرنے کی اجازت نہیں ہونی چاہیے۔ مریم نواز کو اپنے طرزِ بیان اور مؤقف پر سنجیدگی سے غور کرنا چاہیے تاکہ معاشرے میں قانون کی حکمرانی اور انصاف کا تصور برقرار رہ سکے۔
