بیٹی اور داماد کے کیسز کے معاملے پر شیریں مزاری میڈیا سے گفتگو کے دوران آبدیدہ ہوگئیں

اسلام آباد(قدرت روزنامہ)پاکستان تحریک انصاف کی سابق رہنما اور سابق وفاقی وزیر انسانی حقوق ڈاکٹر شیریں مزاری نے اپنی بیٹی ایمان مزاری اور داماد ہادی علی کیس کے حوالے سے عدالتی نظام اور ریاستی رویے پر سخت غم و غصے کا اظہار کیا اور گفتگو کے دوران وہ آبدیدہ ہوگئیں۔
اسلام آباد میں سپریم کورٹ کے باہر میڈیا کے نمائندوں سے بات چیت کرتے ہوئے ڈاکٹر شیریں مزاری نے آبدیدہ لہجے میں کہا کہ میری بیٹی اور داماد وزیراعظم کی بیٹی اور داماد تو نہیں ہیں کہ کرپشن اور سنگین مقدمات کے باوجود انہیں فوری رہائی یا استثنیٰ مل جائے، اگر ریاست نے میری بیٹی ایمان مزاری اور داماد ہادی علی کو پوری زندگی جیل میں رکھنا ہے یا سزائے موت دینی ہے تو کھل کر بتا دیا جائے، ہمیں روز روز عدالتوں میں کیوں خوار کیا جا رہا ہے؟۔

ہمیں انصاف نہیں مل رہا، لیکن آج کے پاکستان کا یہی انصاف ہے۔ میری بیٹی اور داماد (ایمان مزاری اور ہادی علی) وزیراعظم کی بیٹی اور داماد تو نہیں ہیں کہ کرپشن کے مقدمات میں اشتہاری و مفرور ہونے کے باوجود باعزت بری ہو جائیں۔ میرا داماد جسٹس آصف کا بیٹا تو نہیں کہ دو خواتین کے قتلِ عام کے بعد اگلے ہی دن بری ہو جائے۔ جس طرح ایمان اور ہادی کا جیل ٹرائل کیا گیا، انہیں پنجرے میں بند کر کے عدالت لایا جاتا رہا اور شیم ٹرائل کیا گیا، لیکن سپریم کورٹ صرف اس انتظار میں بیٹھی رہی کہ کب انہیں سزا سنا دی جائے؛ میڈم شیریں مزاری نظامِ انصاف اور اپنی بیٹی و داماد کے ساتھ ہونے والے غیر منصفانہ سلوک کو بیان کرتے ہوئے جذبات پر قابو نہ رکھ سکیں۔
اور جرم یہ ہے کہ ایمان مزاری و ہادی علی چھٹہ صرف انسانی حقوق کی بات کرتے ہیں، مظلوم کے ساتھ کھڑے ہوتے ہیں، بے آوازوں کی عدالتوں میں آواز بنتے ہیں۔ اللہ مشکلات آسان فرمائے۔

— Waseem Malik (@iwaseemmalik) November 11, 2026

سابق وفاقی وزیر نے الزام عائد کیا کہ ملکی نظام میں انصاف کا معیار بااثر اور عام شہریوں کے لیے بالکل مختلف ہے، میرا داماد کسی جسٹس یا با اثر شخصیت کا بیٹا نہیں ہے جو دو خواتین کے قتلِ عام جیسے سنگین معاملے کے باوجود اگلے ہی دن باعزت بری ہو جائے، آج کے پاکستان کا یہی تلخ سچ اور انصاف ہے جہاں با اثر مفرور اور اشتہاری لوگ کرپشن کیسز سے صاف بچ نکلتے ہیں اور عام شہریوں پر بے بنیاد مقدمات کی بھرائیم کی جاتی ہے۔
ڈاکٹر شیریں مزاری نے اپنی بیٹی اور داماد کے خلاف جاری قانونی کارروائی کو شدید تنقید کا نشانہ بناتے ہوئے اسے ایک ‘شیم ٹرائل’ قرار دیا، انہوں نے بتایا کہ ان کی بیٹی اور داماد کو پنجرے میں بند کرکے عدالتوں میں لایا جاتا رہا اور جیل کے اندر نا انصافی پر مبنی ٹرائل کیا گیا، اعلیٰ عدلیہ اس تمام تر کارروائی کو دیکھتی رہی اور سپریم کورٹ جیسے اہم ادارے صرف اس انتظار میں بیٹھے رہے کہ کب انتظامیہ اور نیچے کی عدالتیں انہیں سزا سناتی ہیں۔
انہوں نے مزید بتایا کہ ان کی قانونی ٹیم اور وکلا تمام مقدمات کی باقاعدہ اور قانونی طریقے سے پیروی کر رہے ہیں، لیکن اس کے باوجود انہیں کسی قسم کا انصاف نہیں مل رہا، ہم تمام آئینی اور قانونی دروازے کھٹکھٹا چکے ہیں، مگر جب فیصلوں کا محور قانون کے بجائے سیاسی یا دیگر ترجیحات بن جائیں تو انصاف کی امید ختم ہو جاتی ہے، جب ایک قانون دان اور انسانی حقوق کے لیے آواز اٹھانے والے جوڑے کے ساتھ اس طرح کا غیر انسانی سلوک کیا جا سکتا ہے تو عام شہریوں کے حقوق کی کیا ضمانت ہو سکتی ہے؟ انہوں نے اپیل کی کہ ان کی بیٹی اور داماد کے ساتھ بلاجواز اور انتقامی بنیادوں پر قائم مقدمات کا خاتمہ کیا جائے۔