کراچی میں 3 روز کی مختصر ہیٹ ویو کا امکان، چیف میٹرو لوجسٹ

کراچی (قدرت روزنامہ)چیف میٹرو لوجسٹ سردار سرفراز کا کہنا ہے کہ کراچی تین روز مختصر ہیٹ ویو کی لپیٹ میں رہے گا، اس دوران موسم گرم، کبھی بہت گرم اور خشک رہنے کا امکان ہے . سردار سرفراز نے بتایا ہے کہ شہر قائد میں تین روز کے مختصر ہیٹ ویو کے دوران درجۂ حرارت 39 سے 41 ڈگری سینٹی گریڈ تک جاسکتا ہے، دن کے اوقات میں سمندری ہوائیں معطل رہیں گی .

چیف میٹرولوجسٹ کا کہنا تھا کہ شمال مغرب سے گرم اور خشک ہوائیں چلیں گی، افغانستان اور مغربی بلوچستان پر ہوا کا زائد دباؤ موجود ہے، 2 اپریل سے موسم بہتر ہوجائے گا .
انہوں نے مزید بتایا کہ رمضان کے پہلے ہفتے میں کراچی کا درجۂ حرارت 34 سے 35 ڈگری سینٹی گریڈ رہنے کا امکان ہے جبکہ 8 اپریل کے بعد گرمی کی شدت میں ایک بار پھر اضافے کا امکان ہے . اس کے علاوہ سندھ کے دیگر اضلاع میں موسم گرم، کبھی بہت گرم اور خشک رہنے کا امکان ہے، جبکہ صوبے کے دیگر اضلاع میں درجہ حرارت 43 سے 45 ڈگری سینٹی گریڈ رہ سکتا ہے .