اے ٹی سی عدالت نے رانا ثناء اللہ کے ناقابل ضمانت وارنٹ گرفتاری منسوخ کر دیے

گوجرانوالہ(قدرت روزنامہ) انسداد دہشتگردی عدالت (اے ٹی سی) نے وزیر داخلہ رانا ثناء اللہ کے ناقابل ضمانت وارنٹ گرفتاری منسوخ کرنے کا حکم دے دیا۔انسداد دہشتگردی عدالت گوجرانوالہ میں لیگی رہنما رانا ثناء اللہ کے ناقابل وارنٹ گرفتاری کے حوالے سے کیس کی سماعت ہوئی، عدالت نے رانا ثناء اللہ کو 5 لاکھ روپے کے ضمانتی مچلکے جمع کروانے کا حکم دیتے ہوئے مزید سماعت 28 اپریل تک ملتوی کر دی۔
عدالت پیشی کے موقع پر میڈیا سے گفتگو کرتے ہوئے وزیر داخلہ رانا ثناء اللہ نے کہا کہ عمران خان نیازی کے خلاف ابھی تک قانون حرکت میں نہیں آیا، عمران خان کی روایت کی ابھی تک پکڑ نہیں ہوئی، ان کیلئے ابھی تک وسیع پیمانے پر ضمانتوں کا جمعہ بازار لگا ہوا ہے، عمران نیازی کا احتساب ہونا چاہیے اور وہ ضرور ہوگا۔
وزیر داخلہ نے کہا کہ ہم ان کے آئی ایم ایف معاہدے کو پورا کرتے کرتے کہاں پہنچ گئے ہیں، انہوں نے دہشتگردوں کو آنے کی اجازت دی جس سے حالات خراب ہوئے، عمرانی فتنہ اور جمہوریت اکٹھے نہیں چل سکتے۔انہوں نے کہا کہ اگر اسمبلیوں کے الیکشن علیحدہ ہوں گے ملک میں انارکی ہوگی، الیکشن 8 اکتوبر کو اکٹھے ہونے چاہئیں، میں نے قتل کی کوئی دھمکی نہیں دی، سیاستدان ہمیشہ سیاسی بات کرتا ہے، میں نے سیاسی وجود کی بات کی ہے۔
رانا ثناء اللہ کا مزید کہنا تھا کہ پی ٹی آئی میں سے اب اتنا کچھ نکلے گا کہ صرف فتنہ بچے گا، مریم نواز کبھی جتھے لے کر عدالت پیش نہیں ہوئیں، میں نے آج پیشی پر کسی کو نہیں کہا کہ آپ یہاں آئیں، آج ہم نے اپنے کارکنان کو کنٹرول کیا اور عدالت میں ساتھ صرف وکلا گئے ہیں۔