آج کیوں ناں کچھ میٹھا ہوجائے ، چلیے بناتے ہیں لبِ شیریں

اسلام آباد (قدرت روزنامہ)جمعتہ الوداع کے اس بابرکت دن پر افطار دسترخوان کے لیے کیوں ناں کچھ میٹھا ہوجائے .
آج بنائیں مزیدار لبِ شیریں،جسے بڑے اور بچے دونوں ہی شوق سے کھائیں .

اجزاء:
دودھ ½ 1 لیٹر، چینی 2 کپ، فریش کریم 1 کپ، ونیلا کسٹرڈ یا کارن فلور 3 کھانے کے چمچے، لال جیلی 1 پیکٹ، پیلی جیلی 1 پیکٹ، ہری جیلی 1 پیکٹ، ابلی رنگین سوئیاں 1 کپ، آم 2 عدد، کیلے 4 عدد، سیب 3 عدد، انگور 1 کپ، آڑو 1 عدد، پستے، بادام 1 کپ .
ترکیب:
ونیلا کسٹرڈ یا کارن فلور کو تھوڑے سے پانی یا پھر ٹھنڈے دودھ میں گھول لیں .
اب دیگچی میں دودھ اور چینی ڈال کے اُبلنے کے لیے رکھ دیں . جب چینی اچھی طرح حل ہو جائے تو اس میں پہلے سے حل شدہ کارن فلور یا پھر ونیلا کسٹرڈ کو اس گرم دودھ کے مکسچر میں شامل کرلیں اور اس دوران مسلسل چمچہ چلاتی رہیں کہ کسٹرڈ گاڑھا ہوجائے .
اب اس کو ٹھنڈا کرلیں اور تھوڑا سا کسٹرڈ پیالے میں نکالیں پھر اس میں کریم مکس کریں اور اس مکسچر کو فریج میں رکھ دیں .
اب جیلی کو پکا کے جمالیں اور جمنے کے بعد کیوب کی شکل میں کاٹ لیں . سارے پھلوں کو بھی چھیل کر کیوب کی شکل میں کاٹ لیں .
پھر ایک پیالے میں سارے پھل، جیلی، رنگین اُبلی ہوئی سویاں ڈال کے اوپر کسٹرڈ ڈال دیں . اسے پستے، بادام سے سجا کے ٹھنڈا کرکے پیش کریں .