’جھوٹ پھیلانے سے گریز کریں‘، بیٹے کی پیدائش سے متعلق خبرپر حارث رؤف کا ردِعمل

اسلام آباد (قدرت روزنامہ)قومی کرکٹ ٹیم کے فاسٹ بولر حارث رؤف نے پہلے بچے کی ولادت سے متعلق گردش کرنے والی خبروں پر سخت ردعمل کا اظہار کیا ہے۔
دو روز قبل سوشل میڈیا پر گردش کرنے والی خبروں میں دعویٰ کیا گیا تھا کہ حارث رؤف اور مزنا مسعود کے ہاں پہلے بچے کی پیدائش ہوئی ہے۔
صارفین نے ایک نومولود بچے کی تصویر کو حارث رؤف کا بیٹا قرار دے دیا تھا جس کی کرکٹر نے سختی سے تردید کرتے ہوئے جعلی خبروں کی روک تھام کی درخواست کی ہے۔
حارث رؤف نے سوشل میڈیا پر جاری اپنے خصوصی پیغام میں لکھا کہ ‘میرے بچے سے متعلق پیدائش کی خبریں جھوٹی ہیں، برائے مہربانی جھوٹی خبریں پھیلانے اور ان پر یقین کرنے سے گریز کریں’۔
کرکٹر نے مزید لکھا ان کی ذاتی زندگی سے متعلق کوئی بھی معلومات جو کسی غیر مصدقہ سوشل میڈیا اکاؤنٹ پر نظر آئے وہ افواہ کے سوا کچھ نہیں ہو گی۔
واضح رہے کہ فاسٹ بولر حارث رؤف اپنی دیرینہ دوست مزنا مسعود ملک سے دسمبر 2022 میں رشتہ ازدواج میں منسلک ہوئے تھے جب کہ دونوں کی شادی کی تقریبات جولائی 2023 میں ہوئی تھیں۔