دنیا کے امیر ترین شخص ایلون مسک کے ہاں 14ویں بچے کی پیدائش

اسلام آباد (قدرت روزنامہ)معروف امریکی کمپنی ٹیسلا کے بانی اور ڈونلڈ ٹرمپ کے قریبی مشیر ایلون مسک کے ہاں 14ویں بچے کی پیدائش ہوئی ہے۔
ایلون مسک کی جانب سے 14ویں بچے کی پیدائش پر خوشی کا اظہار کیا گیا ہے، اور انہوں نے اس کی باقاعدہ تصدیق بھی کردی ہے۔
شیون زیلیس جو اس سے قبل ایلون مسک کے تین بچوں کی ماں ہیں، انہوں نے ایکس پر پوسٹ شیئر کرتے ہوئے ایلون مسک کے چوتھے بچے کی پیدائش کا اعلان کیا ہے۔
سوشل میڈیا پر پوسٹ شیئر کرتے ہوئے انہوں نے لکھا کہ ایلون سے مشورہ کرنے کے بعد آرکیڈیا کی پہلی سالگرہ کے موقع پر ہمیں اپنے بیٹے سیلڈن لائکرگس کے بارے میں لوگوں کو براہِ راست بتانا بہتر لگا۔
ایلون مسک نے شیون زیلیس کی پوسٹ کا جواب دیتے ہوئے سرخ دل والا ایجوجی بنایا اور اپنے بچے کی پیدائش کی تصدیق کردی۔
یاد رہے کہ شیون زیلیس ایلون مسک کی کمپنی نیورا لنک میں اعلیٰ ایگزیکٹیو کے عہدے پر فائز ہیں، اور اس سے قبل ان سے ایلون مسک کے تین بچے ہیں۔
ایلون مسک اور شیون زیلیس نے بچے کی پیدائش کا اعلان کیا ہے تاہم یہ نہیں بتایا کہ یہ بچہ کب پیدا ہوا۔
یہ بھی واضح رہے کہ اس سے قبل 26 سالہ خاتون ایشلے سینٹ کلیئر نے سوشل میڈیا پیغام کے ذریعے ایلون مسک کے 13ویں بچے کی پیدائش کا اعلان کیا تھا۔