چیمپیئنز ٹرافی: لاجسٹک اور شیڈول کے مسائل پر ویوین رچرڈز آئی سی سی پر برہم

اسلام آباد (قدرت روزنامہ)ویسٹ انڈیز کے سابق کپتان ویوین رچرڈز نے چیمپیئنز ٹرافی کے شیڈول اور لاجسٹک میں مسائل پر آئی سی سی پر شدید تنقید کی ہے۔
انہوں نے میڈیا سے گفتگو کرتے ہوئے کہا کہ میرے خیال میں یہ سیاست کی وجہ سے ہورہا ہے، تاہم میں میں سیاست پر بات نہیں کروں گا، البتہ آئی سی سی جو قوانین اور انتظامات کا ذمہ دار ہے ان کی وجہ سے مسئلہ ہے۔
رچرڈز نے کہا کہ اگر آئی سی سی اس کا ذمہ دار ہے تو میں پوچھنا چاہتا ہوں کہ ایسا کیوں ہورہا ہے۔
انہوں نے مزید کہا کہ میں اس بات پر یقین رکھتا ہوں کہ شائقین اور یہاں تک کہ دشمنوں کو بھی کوئی ایک چیز اگر متحد کرسکتی ہے تو وہ کھیل ہے۔
واضح رہے کہ پاکستان کی میزبانی میں ہونے والی چیمپیئنز ٹرافی نیوٹرل وینیو پر کھیلنے کی بھارت کی ضد نے ایونٹ کے شیڈول اور لاجسٹک کے حوالے سے ٹیموں اور آئی سی سی کو مشکل میں ڈال دیا ہے۔
اس سے قبل گروپ بی کی سیمی فائنلسٹ آسٹریلیا اور جنوبی افریقہ دونوں کو ایک مشکل صورتحال میں ڈال دیا کیونکہ دونوں ٹیموں کو دبئی کا سفر کرنا پڑا۔
آئی سی سی کے ترجمان نے بتایا ہے کہ یہ فیصلہ گروپ بی کی 2 سیمی فائنلسٹ ٹیموں کو 4 مارچ کو شیڈول 2013 کے چیمپیئنز کے خلاف ممکنہ ناک آؤٹ میچ سے قبل حالات سے ہم آہنگ ہونے کے لیے کیا گیا۔