وزیرصحت پنجاب کی مارکیٹ میں پیناڈول گولیوں کی دستیابی یقینی بنانے کی ہدایت
تفصیلات کے مطابق صوبائی وزیرصحت ڈاکٹر یاسمین راشد نے سیکرٹری پرائمری اینڈ سیکنڈری ہیلتھ کئیرپنجاب عمران سکندر بلوچ کو مارکیٹ میں پیناڈول گولیوں کی دستیابی یقینی بنانے کی ہدایت کر دی ہے . ایڈیشنل سیکرٹری ڈرگز کنٹرول ڈاکٹر سہیل مارکیٹ میں پیناڈول گولیوں کی دستیابی کو یقینی بنانے کے لیے متحرک ہو گئے ہیں . ایڈیشنل سیکرٹری ڈرگز کنٹرول ڈاکٹرمحمد سہیل نے کہا کہ مارکیٹ میں جمعہ کے روز پیناڈول کی 3 کروڑ 24 لاکھ گولیاں تقسیم کی گئیں . آج لاہور میں پیناڈول کی مزید 2 کروڑ 15 لاکھ، فیصل آباد میں 45 لاکھ، سرگودھا میں 31 لاکھ، اوکاڑہ میں 26 لاکھ، گجرات میں 13 لاکھ گولیاں تقسیم کی گئی ہیں . انہوں نے بتایا کہ مارکیٹ میں اس وقت پیناڈول گولی متبادل کمپنی کی جانب سے Calpol، پیراسیٹامول(یونیسکو)، اور ٹائیلول کمپنی کے ناموں سے بھی دستیاب ہیں . اس ضمن میں چیف ڈرگز کنٹرولر نے ڈرگ ریگولیرٹی اتھارٹی اسلام آباد کو بھی مطلع کر دیا ہے . سیکرٹری محکمہ پرائمری اینڈسیکنڈری ہیلتھ کیئرپنجاب عمران سکندر بلوچ نے کہا ہے کہ مارکیٹ میں فیلڈ فورس کی مدد سے پیناڈول گولی کی دستیابی کو یقینی بنایا جا رہا ہے . صوبائی وزیرصحت ڈاکٹریاسمین راشد نے کہا کہ پنجاب کے سرکاری ہسپتالوں میں ڈینگی کے مریضوں کیلئے پیناڈول گولی سمیت تمام طبی سہولیات دستیاب ہیں . . .
