سابق وزیر اعظم راجہ پرویز اشرف نے بھاشا ڈیم کے حوالے سےاہم تجویز دیدی

لاہور( قدرت روزنامہ)سابق وزیر اعظم راجہ پرویز اشرف نے بھاشا ڈیم کے حوالے سےاہم تجویز دیدی ۔

سابق وزیراعظم اور پاکستان پیپلز پارٹی وسطی پنجاب کے صدر راجہ پرویز اشرف نے کہا ہے کہ پاکستان کا کوئی منصوبہ چاروں بھائیوں کو اعتماد میں لیے بغیر مکمل نہیں ہونا چاہیے، کالاباغ ڈیم پر بھی کسی کو اعتماد میں نہ لیا گیا پھر کسی سے یہ منصوبہ مکمل نہ ہو سکا ،صوبوں میں اختلافات پیدا ہوگئے حتیٰ کہ پچاس سال مکمل ہو گئے مگر کوئی آمر بھی اسے مکمل نہ کر سکا ۔

وہ پیپلز پارٹی پنجاب کے ڈپٹی جنرل سیکرٹری عثمان ملک سے ان کی والدہ کی وفات پر تعزیت کے بعد میڈیا سے گفتگو کر رہے تھے۔اس موقع پر پیپلز پارٹی وسطی پنجاب کے جنرل سیکرٹری سید حسن مرتضیٰ ،چودھری اسلم گل،احسن رضوی،ڈاکٹر مبشر،آغا تقی سمیت دیگر رہنما بھی موجود تھے۔

“این این آئی ” کے مطابق راجہ پرویز اشرف نے کہا کہ بھاشا ڈیم متبادل ہے تو اس پر کسی کو اعتراض نہیں، اسے مکمل کریں،ہم وفاق کو جوڑنے والے لوگ ہیں۔ کینالزمنصوبے پر دانش کے ساتھ کام ہونا چاہیے ۔ پیپلز پارٹی ، مسلم لیگ (ن) کے ساتھ وفاق میں اتحاد میں ہے، اہم ایشو پر بات کرتے ہیں،پیپلز پارٹی ایک انتخابی جماعت ہے۔