بحری شعبے میں بریک تھرو: پہلی بار مکمل ٹرانس شپمنٹ کارگو جہاز کی آمد، کراچی بندرگاہ کا نیا سنگ میل
کراچی (قدرت روزنامہ)وفاقی وزیر بحری امور محمد جنید انوار چوہدری کی اصلاحاتی پالیسیوں کے مثبت نتائج سامنے آنا شروع ہو گئے ہیں جس کے تحت کراچی پورٹ پر ایک اہم سنگ میل عبور کر لیا گیا۔
وزیر بحری امور نے اعلان کیا کہ پہلی بار مکمل ٹرانس شپمنٹ جنرل کارگو جہاز ایم وی ارلن کی کامیاب برتھنگ عمل میں آئی ہے جسے پاکستان کے بحری شعبے کے لیے بڑی پیشرفت قرار دیا جا رہا ہے۔
محمد جنید انوار چوہدری کے مطابق ماضی میں کراچی بندرگاہ پر صرف کنٹینرز کی ٹرانس شپمنٹ ہوتی تھی تاہم اب جنرل کارگو، بلک، بریک بلک اور گاڑیوں کی ہینڈلنگ کا آغاز ہونے سے نئے تجارتی مواقع پیدا ہوں گے۔
انہوں نے کہا کہ کراچی پورٹ ٹرسٹ جدید ٹرانس شپمنٹ دور میں داخل ہو چکا ہے اور بندرگاہ تیزی سے خطے کے ایک اہم ٹرانس شپمنٹ مرکز میں تبدیل ہو رہی ہے جس سے عالمی تجارتی راستوں کو جوڑنے میں پاکستان کا کردار مزید مضبوط ہوگا۔
وفاقی وزیر کا کہنا تھا کہ بحری شعبے میں متعارف کرائی گئی اصلاحات کے مثبت اثرات نمایاں طور پر سامنے آ رہے ہیں اور حکومت بندرگاہوں کی ترقی کے ذریعے خطے کی تجارت کا مستقبل روشن بنانے کے لیے پرعزم ہے۔
