امریکا ایران کشیدگی میں کمی کے آثار، عالمی منڈی میں خام تیل کی قیمتوں میں نمایاں کمی

اسلام آباد(قدرت روزنامہ)امریکا اور ایران کے درمیان کشیدگی میں کمی کے اشاروں کے بعد عالمی منڈی میں خام تیل کی قیمتوں میں نمایاں کمی ریکارڈ کی گئی ہے۔
امریکی خام تیل ویسٹ ٹیکساس انٹرمیڈیٹ (WTI) کی قیمت میں 4 فیصد سے زائد کمی ہوئی، جس کے بعد تقریباً 4.50 ڈالر فی بیرل کی گراوٹ کے ساتھ اس کی قیمت 84 ڈالر فی بیرل کے قریب آ گئی۔ ماہرین کے مطابق یہ حالیہ عرصے کی سب سے بڑی یومیہ کمیوں میں سے ایک ہے۔
اسی طرح عالمی معیار سمجھے جانے والے برطانوی خام تیل برینٹ (Brent) کی قیمت بھی 4.86 فیصد کمی کے بعد 92 ڈالر فی بیرل تک پہنچ گئی۔
دوسری جانب متحدہ عرب امارات کے مربان (Murban) خام تیل کی قیمت میں سب سے زیادہ کمی دیکھی گئی۔ مربان خام تیل 9.44 فیصد گر کر 97 ڈالر فی بیرل پر آ گیا، جسے خلیجی توانائی مارکیٹ میں ایک بڑی تبدیلی قرار دیا جا رہا ہے۔
توانائی کے شعبے سے وابستہ ماہرین کا کہنا ہے کہ اگر امریکا اور ایران کے درمیان کشیدگی میں مزید کمی آتی ہے اور خطے میں امن برقرار رہتا ہے تو آئندہ چند روز کے دوران خام تیل کی قیمتوں پر مزید دباؤ پڑ سکتا ہے۔ تاہم ان کے مطابق مشرق وسطیٰ کی صورتحال اب بھی غیر یقینی ہے اور کوئی بھی نئی پیش رفت قیمتوں کا رخ دوبارہ تبدیل کر سکتی ہے۔
ماہرین کے مطابق آئندہ ہفتوں میں عالمی معیشت، ایندھن کی طلب، اوپیک پلس (OPEC+) کی پیداوار اور جغرافیائی سیاسی صورتحال خام تیل کی قیمتوں کے تعین میں اہم کردار ادا کریں گے، جبکہ سرمایہ کار خطے کی صورتحال پر گہری نظر رکھے ہوئے ہیں۔